Կիրանցի դպրոցում ևս «Վերջին զանգ» է

ԵՐԵՎԱՆ, 24 մայիսի – Sputnik․ Տավուշի մարզի Կիրանց գյուղում ևս այսօր «Վերջին զանգ» է։ Գյուղի 9-ամյա հիմնական դպրոցն այս տարի 8 շրջանավարտ ունի։ Չնայած լարված, անորոշ իրավիճակին՝ դպրոցում տոնական միջոցառում է կազմակերպվել։

Նշենք, որ 9-ամյա այս դպրոցի շենքը վթարային է, գյուղում նոր դպրոց է կառուցվում, որը շահագործման պետք է հանձնվեր մի քանի ամսից։ Սեպտեմբերին արդեն կիրանցեցի դպրոցականները նոր շենքում պետք է սովորեին, սակայն նոր դպրոցի ճակատագիրն այսօր անհայտ է։ Ըստ հրապարակված քարտեզների՝ սահմանազատման հետևանքով սահմանագիծն անցնելու է նոր մասնաշենքից մի քանի տասնյակ մետր հեռավորության վրա։ Անվտանգային առումով սա մտահոգում է գյուղացիներին, բնակիչներն ասում են՝ չեն համաձայնի իրենց երեխաներին դպրոց ուղարկել՝ իմանալով, որ թշնամին նրանցից ընդամենը մի քանի քայլ հեռավորության վրա է լինելու։

Հավելենք՝ ՀՀ ԱԱԾ-ն հայտնել է, որ այսօրվանից ՀՀ Ազգային անվտանգության ծառայության սահմանապահ զորքերը պաշտոնապես ստանձնում են Հայաստանի Հանրապետության պետական սահմանի Տավուշի մարզի Բերքաբեր բնակավայրի 1,9 կմ, Ոսկեպար և Բաղանիս բնակավայրերի 4,9 կմ հատվածների պահպանությունը։

Պետական սահմանի Կիրանց բնակավայրի 5,8 կմ հատվածի պահպանությունը, մինչև 2024 թվականի հուլիսի 24-ը, կիրականացվի անցումային սխեմայով։

Նշենք նաև, որ այս տարի 9-րդ դասարանի շրջանավարտների թիվը 39.406 է, իսկ 12-րդ դասարանցիներինը՝ 20.554, ընդհանուր՝ 59 960։