ԵՐԵՎԱՆ, 22 մայիսի – Sputnik․ Հայաստանի հանրապետական կուսակցությունը կսատարի «Տավուշը հանուն հայրենիքի» շարժման առաջնորդ Բագրատ սրբազանի առաջադրած վարչապետի թեկնածուին։ Լրագրողների հետ զրույցում այս հայտարարությունն արեց ՀՀ երրորդ նախագահ, ՀՀԿ ղեկավար Սերժ Սարգսյանը։
Նրա կարծիքով` շարժումն այս պահին լավ թափ է առել, և բոլոր հնարավորությունները ճիշտ օգտագործելու պարագայում կհասնի հաջողության։
Սարգսյանը նաև նշեց, որ Բագրատ սրբազանի հետ հանդիպելու հրավեր չի ստացել, բայց հավելեց, որ առիթ ունեցել են հանդիպելու։ Լրագրողի ճշտող հարցին, թե երբ են հանդիպել, նա պատասխանեց. «Ո՛չ այսօր, ո՛չ երեկ, ո՛չ էլ երեկ չէ առաջին օրը»։
Նա անդրադարձավ նաև ՀՀԿ խոսնակ Էդուարդ Շարմազանովի այն հայտարարությանը, որ ինքը չի միանալու այն ուժերի հետ, որոնք իրենց կուսակցությանը համարում են չարիք։
«Էդուարդ Շարմազանովն ասել է, որ միավորվելու բան չունի տարբեր–տարբեր խմբավորումների ու ուժերի հետ, բայց մենք որևէ մեկի հետ չենք միավորվել, մենք ամբողջովին սատարում ենք այս շարժմանը, բայց այդքանը»,– ասաց նա։
Սերժ Սարգսյանի կարծիքով` իշխանությունները ոչ թե քննադատում են, այլ հիմնականում զրպարտում են ցանկացած ընդդիմադիր հայացք ունեցող մարդու։
«Եթե վախենում են նախկինների վերադարձից, թող գնան, խաչակնքվեն, թող գնան, վախերը չափեն, թող գնան, սառը ջուր խմեն։ Ինչ ուզում են, թող անեն, բայց մենք վերադառնալու որևէ ցանկություն չունենք»,– ասաց նախկին նախագահը։
Նա հիշեցրեց, որ ՀՀԿ–ն պայքարում է ոչ թե իշխանության, այլ իշխանափոխության համար։
Հիշեցնենք` հայ–ադրբեջանական սահմանազատումից դժգոհ քաղաքացիները տևական ժամանակ ակցիաներ էին անում Տավուշի մարզում։ «Տավուշը հանուն հայրենիքի» շարժման անդամներն ու նրանց կողմնակիցները մայիսի 4-ին որոշեցին Կիրանց գյուղից երթով գալ Երևան։ Մայիսի 9-ին նրանք հասան մայրաքաղաք։ Այդ օրը Հանրապետության հրապարակում հանրահավաք տեղի ունեցավ, և շարժման առաջնորդ Բագրատ սրբազանը ՀՀ վարչապետ Նիկոլ Փաշինյանին մեկ ժամ ժամանակ տվեց հրաժարականի համար, ինչը տեղի չունեցավ։ Դրանից հետո նա կոչ արեց մայիսի 10-ից անհնազանդության խաղաղ ակցիաներ սկսել ամբողջ հանրապետությունում։ Շարժման մասնակիցներն ու կողմնակիցները հաջորդ օրվանից սկսեցին փողոցներ ու ճանապարհներ փակել, իրազեկման ակցիաներ իրականացնել` քաղաքացիներին հորդորելով միանալ իրենց։
Վերջին մի քանի օրերին Բագրատ արքեպիսկոպոս Գալստանյանը հանդիպումներ է անցկացնում տարբեր ոլորտների ներկայացուցիչների հետ և ամեն երեկո օրն ամփոփում Սուրբ Աննա եկեղեցու բակում։