ԵՐԵՎԱՆ, 22 մայիսի – Sputnik․ Առաջիկայում նախատեսվում էր Իրանի նախագահ Էբրահիմ Ռայիսիի այցը մեր երկիր։ Այս մասին Իրանի դեսպանությունում բացված սգո մատյանում ցավակցական գրառում կատարելուց հետո լրագրողների հետ զրույցում ասաց ՀՀ ԱԺ նախագահ Ալեն Սիմոնյանը։
«Դա մեզ համար շատ կարևոր էր»,- նշեց Սիմոնյանը։
Նա շեշտեց, որ Իրանի նախագահն ու ԱԳ նախարարը թե՛ մեր երկրի, թե ՛տարածաշրջանի համար շատ ակտիվ ջանքեր էին ներդնում, ուստի սա շատ ցավալի կորուստ է։
Նշենք, որ վաղ առավոտից Հայաստանում Իրանի դեսպանությունում սգո մատյան է բացվել, որում ցավակցական գրառումներ են կատարում ՀՀ բարձրաստիճան պաշտոնյաները, Հայաստանում հավատարմագրված օտարերկրյա դիվանագիտական ներկայացուցչությունների ղեկավարները։ Առաջիններից մեկը սգո մատյանում գրառում է արել ՀՀ-ում ՌԴ դեսպան Սերգեյ Կոպիրկինը։
Հիշեցնենք` Իրանի նախագահ Էբրահիմ Ռայիսիին և արտգործնախարար Հոսեյն Ամիր Աբդոլլահիանին տեղափոխող ուղղաթիռը կործանվել է մայիսի 19-ին երկրի հյուսիս-արևմուտքում՝ Վերզեգանի շրջանում: Բարձրաստիճան պաշտոնյաները վերադառնում էին Արաքս գետի վրա հիդրոհանգույցների բացման արարողությունից, որին մասնակցում էր Ադրբեջանի նախագահ Իլհամ Ալիևը: Փրկարարների թիմերը մեկնել էին արտակարգ պատահարի վայր և որոնումներ իրականացրել ամբողջ գիշեր, նրանց աշխատանքը բարդացել էր մթության և տեղատարափի պատճառով:
Մայիսի 20-ի առավոտյան հայտնի դարձավ, որ հայտնաբերվել են ուղղաթիռի այրված բեկորները, իսկ ինքնաթիռում գտնվող բոլոր մարդիկ մահացել են։
Ուղղաթիռի կործանման հետևանքով մահացել են Իրանի նախագահ Էբրահիմ Ռայիսին, արտաքին գործերի նախարար Հոսեյն Ամիր Աբդոլլահիանը, Արևելյան Ադրբեջանի նահանգապետ Մալիք Ռահմաթին, Թավրիզում ուրբաթօրյա աղոթքի ղեկավար այաթոլլա Մոհամմադ Ալի ալ–է–Հաշեմը, ԻՀՊԿ ներկայացուցիչ Սեյեդ Մեհդի Մուսավին ու անձնակազմի 3 անդամները։
Իրանի նախագահի լիազորությունները 2 ամսով փոխանցվել են առաջին տեղակալ Մոհամմադ Մոհբերին։