ԵՐԵՎԱՆ, 22 մայիսի – Sputnik. Շուռնուխի տների բաշխման գործընթացը տեղի կունենա առաջիկա օրերին։ Այսօր ԱԺ–ում կառավարության հետ հարցուպատասխանի ժամանակ այս հայտարարությունն արեց ՀՀ տարածքային կառավարման և ենթակառուցվածքների նախարար Գնել Սանոսյանը։
«Խնդիրներ այլևս չկան: Շինարարությունն ավարտվել է ապրիլին, հանձնաժողովն ընդունել է շինարարության ավարտական ակտերը։ Պետական գույքի կառավարման կոմիտեն Կադաստրի կոմիտեի հետ աշխատելու արդյունքում արդեն ունի այդ գույքերի վկայականները, և առաջիկա օրերին կկազմակերպվի վիճակահանություն կամ բնակարանների բաշխման գործընթաց, որով էլ մեր հարգելի քաղաքացիներից յուրաքանչյուրը կունենա իր բնակարանը»,– ասաց նա։
Նախարարը նշեց, որ խնդիրը միայն 13 տուն կառուցելը չէր. շինարարության ընթացքում խմելու ջրի, էլեկտրաէներգիայի և այլ խնդիրներ էին առաջացել, որոնք արդեն լուծվել են:
Հիշեցնենք` 44-օրյա պատերազմից հետո Շուռնուխի մի մասը (13 տուն) անցել է Ադրբեջանի վերահսկողության տակ։
Այդ տների փոխարեն նոր թաղամասում կառուցվող 13 տների շինարարությունը պետք է ավարտվեր դեռ 2021 թվականին։ Սակայն շինարարության ավարտի ժամկետն արդեն 6 անգամ պաշտոնապես հետաձգվել է։ Քաղաքաշինության կոմիտեից Sputnik Արմենիայի վերջին հարցմանը պատասխանել էին, որ նոր թաղամասի շինարարությունը նախատեսվում է ավարտել 2024 թվականի ապրիլին։
Sputnik Արմենիան ավելի վաղ գրել էր, որ իշխանությունը դադարել է ամսական օգնություն տրամադրել Շուռնուխի բնակիչներին, որոնց տներն անցել են Ադրբեջանի վերահսկողության տակ։ Նրանք 2024-ի սկզբից այլևս չեն ստանում ամսական 68 հազար դրամը։