ԵՐԵՎԱՆ, 21 մայիսի – Sputnik. «Իմնեմնիմի» պոդկաստի համահեղինակներ Նարեկ Սամսոնյանը և Վազգեն Սաղաթելյանը ազատ արձակվեցին։Նման որոշում կայացրեց Երևանի ընդհանուր իրավասության դատարանի դատավոր Արման Հովհաննիսյանը։
«Դատարանը գտնում է, որ Նարեկ Սամսոնյանի և Վազգեն Սաղաթելյանի խափանման միջոցները փետք է փոփոխվեն, և խափանման միջոց է ընտրվում վարչական հսկողությունը»,–ասաց նա։
Միևնույն ժամանակ դատավորը հայտարարեց, որ վարչական հսկողության մեջ գործողությունների սահմանափակում է կիրառվում` կապված «Իմնեմնիմի» հաղորդումը չվարելու հետ։
«Երեք ամիս ժամկետով դուք չեք կարողանալու այդ հաղորդումը վարել, հետագայում միգուցե դա վերանայվի։ Եվ ոչ միայն այդ հաղորդումը, այլ նաև նմանատիպ այլ հաղորդումներ։ Չստացվի` անունը փոխվի»,– ասաց նա։
Հովհաննիսյանը հույս հայտնեց, որ Սաղաթելյանն ու Սամսոնյանը չեն կրկնի իրենց վարքագիծը` շեշտելով, որ հակառակ դեպքում դատարանը կաշկանդված չէ խափանման միջոցի հարցը նորից քննարկելու հարցում։
Հիշեցնենք` մարտի 22-ի առավոտյան ոստիկանության աշխատակիցներն ավտոկայանատեղիում մի քանի հոգով թիկունքից հարձակվել ու անհամաչափ բիրտ ուժի կիրառմամբ գետնին էին տապալել Նարեկ Սամսոնյանին, ապա ձերբակալել նրան։ Այնուհետև իրավապահները գնացել էին նաև Վազգեն Սաղաթելյանի տան մոտ և դատարանի որոշումը ներկայացնելուց հետո ձերբակալել նրան։
Նրանց մեղադրանք է առաջադրվել հաղորդակցական տեխնոլոգիաներն օգտագործելով խմբի կազմում խուլիգանություն կատարելու համար։
Նարեկ Սամսոնյանն ու Վազգենը Սաղաթելյանն ազատությունից զրկվել էին ՀՀ վարչապետ Նիկոլ Փաշինյանի հայտարարությունները կոշտ բառապաշարով քննարկելուց հետո։