ԵՐԵՎԱՆ, 21 մայիսի – Sputnik. G7-ի երկրները չեն բացառում Ուկրաինայի օգտին սառեցված ռուսական ակտիվները ապագայում բռնագրավելու հնարավորությունը՝ ի լրումն դրանց վերաներդրումից ստացված եկամուտներն օգտագործելու առաջարկի, որն այժմ քննարկվում է: Ելույթ ունենալով բրիտանական խորհրդարանի Լորդերի պալատում` այս մասին հայտարարել է Միացյալ Թագավորության ԱԳ նախարար Դևիդ Քեմերոնը։
«Ես շատ կարևոր եմ համարում նշել, որ մենք չենք բացառում նոր միջոցներ ձեռնարկելու հնարավորությունը, որոնք անմիջականորեն կվերաբերվեն բուն ակտիվներին, քանի որ կարող է գալ ժամանակը, երբ Ռուսաստանը կվճարի կամ ստիպված կլինի Ուկրաինային հատուցումներ վճարել նրան հասցված վնասի համար, և այս իրավիճակում ակտիվները, որոնք նախկինի պես մեզ մոտ են, կարող են շատ կարևոր դեր խաղալ», - Քեմերոնի խոսքերն է մեջբերում ՏԱՍՍ-ը:
Մայիսի 21–ին ԵՄ խորհուրդը հաստատեց ռուսական սառեցված սուվերեն ակտիվներից ստացված եկամուտներն Ուկրաինային ռազմական օգնության համար օգտագործելու որոշումը: Հայտարարության մեջ նշվում է, որ այդ ակտիվներից ստացված զուտ շահույթն ուղղվելու է Ուկրաինայի պաշտպանական ներուժի աջակցմանն ու դրա վերականգնմանը: