ԵՐԵՎԱՆ, 21 մայիսի – Sputnik. ԱՄՆ Պետդեպարտամենտի պաշտոնական ներկայացուցիչ Մեթյու Միլլերը Իրանի իշխանություններին է մեղադրել տեղի ունեցած ավիավթարի համար, որի հետևանքով մահացել են ԻԻՀ նախագահն ու արտգործնախարարը:
Ամերիկացի պաշտոնյայի խոսքով` Իրանի իշխանություններն իրենք են մեղավոր, որ ամերիկյան արտադրության 45 տարվա ուղղաթիռը օգտագործել են եղանակային վատ պայմաններում։ Նա միաժամանակ հավելել է, որ ԱՄՆ-ն կպահպանի պատժամիջոցների ռեժիմը իրանական ավիատեխնիկայի նկատմամբ, որից օգտվում են Իսլամական Հանրապետության իշխանությունները:
Միլլերը հայտարարել է, որ Իրանը կառավարական ավիապարկն օգտագործում է տրանսպորտային փոխադրումների համար՝ «ահաբեկչությանն աջակցելու նպատակով»: Մեկնաբանելով Իրանի նախագահ Էբրահիմ Ռայիսիի մահվան կապակցությամբ ԱՄՆ-ի պաշտոնական ցավակցությունները՝ Միլլերն ընդգծել է, որ այդ ցավակցությունները չեն փոխում Վաշինգտոնի հիմնարար վերաբերմունքը Իրանի իշխանությունների նկատմամբ:
Հիշեցնենք` Իրանի նախագահ Էբրահիմ Ռայիսիին և արտգործնախարար Հոսեյն Ամիր Աբդոլլահիանին տեղափոխող ուղղաթիռը կործանվել է մայիսի 19-ին երկրի հյուսիս-արևմուտքում՝ Վերզեգանի շրջանում: Բարձրաստիճան պաշտոնյաները վերադառնում էին Արաքս գետի վրա հիդրոհանգույցների բացման արարողությունից, որին մասնակցում էր Ադրբեջանի նախագահ Իլհամ Ալիևը: Փրկարարների թիմերը մեկնել էին արտակարգ պատահարի վայր և որոնումներ իրականացրել ամբողջ գիշեր, նրանց աշխատանքը բարդացել էր մթության և տեղատարափի պատճառով:
Մայիսի 20-ի առավոտյան հայտնի դարձավ, որ հայտնաբերվել են ուղղաթիռի այրված բեկորները, իսկ ինքնաթիռում գտնվող բոլոր մարդիկ մահացել են։
Ուղղաթիռի կործանման հետևանքով մահացել են Իրանի նախագահ Էբրահիմ Ռայիսին, արտաքին գործերի նախարար Հոսեյն Ամիր Աբդոլլահիանը, Արևելյան Ադրբեջանի նահանգապետ Մալիք Ռահմաթին, Թավրիզում ուրբաթօրյա աղոթքի ղեկավար այաթոլլա Մոհամմադ Ալի ալ–է–Հաշեմը, ԻՀՊԿ ներկայացուցիչ Սեյեդ Մեհդի Մուսավին ու անձնակազմի 3 անդամները։
Իրանի նախագահի լիազորությունները 2 ամսով փոխանցվել են առաջին տեղակալ Մոհամմադ Մոհբերին։