ԵՐԵՎԱՆ, 17 մայիսի – Sputnik․ Տավուշի մարզի Կիրանց գյուղի բնակիչները գիշերել են ճանապարհին, իսկ ոստիկանությունն էլ կրկին փակել է դեպի գյուղ ճամփան։ Այս մասին Sputnik Արմենիային պատմեց կիրանցեցիներից մեկը։
Մայիսի 16-ից գյուղացիները փակել են Հայաստան-Վրաստան միջպետական ճանապարհ՝ չհամաձայնելով Հայաստանի և Ադրբեջանի սահմանազատման հանձնաժողովների նոր պայմանավորվածությունների հետ, որոնք ՀՀ կառավարությունը հրապարակել է մայիսի 15–ին։
Sputnik Արմենիայի հետ զրույցում կիրանցեցիներից մեկը հայտնեց, որ ամբողջ գիշեր իրենք շարունակել են ճանապարհին մնալ։ Միաժամանակ, երեկվանից ոստիկանական անցակետ է տեղադրվել Սարիգյուղ-Բերքաբեր գյուղերի խաչմերուկում։ Այստեղից դեպի Կիրանց անցնել են թույլ տալիս միայն գյուղի գրանցում ունեցողներին։
Նշենք, որ երեկ ամբողջ օրվա ընթացքում կիրանցեցիները պահանջում էին հանդիպում Տավուշի մարզպետ Հայկ Ղալումյանի հետ։ Վերջինս համաձայնել էր հանդիպել գյուղի դպրոցի մոտ՝ առանց լրատվամիջոցների ներկայության։ Գյուղացիներն այս պայմանին չէին համաձայնել՝ հայտարարելով, որ թաքցնելու բան չունեն։ Արդյունքում մարզպետի հետ հանդիպում այդպես էլ չէր կայացել։
Հիշեցնենք` ՀՀ ԱԳՆ–ն մայիսի 15-ին հայտնեց, որ Հայաստանի և Ադրբեջանի սահմանազատման հանձնաժողովները նոր պայմանավորվածություններ են ձեռք բերել։ ՀՀ վարչապետի աշխատակազմը պարզաբանեց, որ, ըստ այդ պայմանավորվածությունների, Կիրանցում ճանապարհի տեղափոխման ու գույքային խնդիր է առաջանալու, բայց մոտ 25 հեկտար գյուղատնտեսական նշանակության հողեր, որոնք վերջին 33 տարում անհասանելի են եղել Կիրանցի համար, վերադարձվելու են գյուղին։