ԵՐԵՎԱՆ, 13 մայիսի – Sputnik. ՀՀ արտգործնախարար Արարատ Միրզոյանը «դասալիք» անվանեց այն դիվանագետների, որոնք Հայաստանի Հանրապետությունում տեղի ունեցող սահմանազատման գործընթացը համարում են ոչ լեգիտիմ և հակաիրավական։ Նա այդ մասին հայտարարեց ԵԱՀԿ գործող նախագահ, Մալթայի արտաքին ու եվրոպական հարցերի և առևտրի նախարար Յան Բորգի հետ ասուլիսի ժամանակ։
Նշենք, որ այդ դիվանագետների թվում են նախկին արտգործնախարար Արա Այվազյանը, նախկին փոխնախարար Ավետ Ադոնցը։
«Ես փորձում եմ հնարավորին չափով չներքաշվել ներքաղաքական որոշ գործընթացների մեջ, բայց ես քաղաքական թիմի անդամ եմ և քաղաքական պաշտոն եմ զբաղեցնում։ Մի քանի չոր արձանագրում անել չեմ կարող։ Ձեր նշած փորձառու դիվանագետները, հավանաբար այն դասալիքներն են, որ լքեցին իրենց պաշտոնը, իրենց բաժին հասած խրամատն այն օրերին, երբ Հայաստանի Հանրապետության սուվերեն տարածքի վրա տեղի էր ունենում ռազմական ագրեսիա»,– նշեց Միրզոյանը։
Նա շեշտեց, որ այդ փաստից հետո որևէ կաթիլ լրջություն չի կարող ունենալ այդ մարդկանց և նրանց դիրքորոշումների նկատմամբ։ Միրզոյանի խոսքով` դա ամենամեղմ գնահատականն է, որ կարող է թույլ տալ իրեն հնչեցնել, իսկ իրականությունը, իր կարծիքով, ավելի վատ է։
Հիշեցնենք` «Տավուշ հանուն հայրենիքի» շարժման առաջնորդ Բագրատ արքեպիսկոպոս Գալստանյանի հանձնարարությամբ ստեղծված դիվանագիտական խորհուրդը մայիսի 12-ին ներկայացրեց սահմանազատման և տարածաշրջանում խաղաղություն հաստատելու։ իր հայեցակարգը: Խորհրդի անունից ելույթ ունեցավ ԱԳՆ նախկին գլխավոր քարտուղար Վահագն Մելիքյանը և սահմանազատման ու սահմանագծման ներկայիս գործընթացը որակեց ոչ լեգիտիմ և հակասահմանադրական: