ԵՐԵՎԱՆ, 12 մայիսի – Sputnik. Լույս աշխարհ է եկել Հայաստանի Հանրապետության ինքնիշխան տարածքի պաշտպանության ժամանակ անմահացած Անդրանիկ Վարդանյանի համանուն եղբայրը: Տեղեկությունը հայտնում է ՀՀ պաշտպանության նախարարության մամուլի ծառայությունը։
Պարտադիր ժամկետային զինծառայող Անդրանիկ Վարդանյանը զոհվել է 2022 թ. սեպտեմբերի 12-ի լույս 13-ի գիշերը ադրբեջանական ագրեսիայի հետևանքով։ 19-ամյա Անդրանիկը փետրվարին պետք է զորացրվեր։ Նա վարորդ էր, ծառայում էր Ջերմուկում։
Նրա մայրը` Նարինե Վարդանյանը, համանուն որդու ծնունդն ապրելու հույս է համարում, որը ստիպում է չհուսալքվել։
«Երբևիցե չեմ մտածել, որ 4–րդ անգամ կարող եմ մայրանալ, սակայն այս բերկրանքը, որ ստացել եմ նրա ծնունդով, չեմ կարող բառերով բացատրել։ Ինքն իր ծնունդով արդեն ապրեցնում է մեզ։ Շատ դժվար է, բայց փոքրիկի հետ կարողանում ես լիցքաթափվել»,– ասում է նա։ Նարինեն ևս 2 դուստր ունի և անգամ թոռներ։
Նորածին Անդրանիկը լույս աշխարհ է եկել «Էրեբունի» ԲԿ–ում ու տան 4–րդ զավակն է։
«Տասնյակ տարիներ անց մենք կարողացել ենք մեր անմհացած որդու երազանքը կատարել. նա շատ էր ուզում եղբայր ունենալ»,– նշում է զոհված զինծառայողի հայրը` Արամ Վարդանյանը։
Նորածնի անունը ևս Անդրանիկ են դրել, սակայն ծնողները վստահեցնում են` նրա մեջ անմահացած որդուն չեն փնտրելու, քանի որ փոքրիկն առանձին անհատ է ու նրան էլ նույն կերպ հայրենասեր են դաստիարակելու։
«Արժեքներ շատ կան, սակայն հայրենիքն առաջին տեղում է»,– ասում է հայրը։
Նշենք, որ Անդրանիկ Վարդանյանը եղել է 2022 թ. սեպտեմբերի 20-ին Ադրբեջանի կողմից Հայաստանին փոխանցված 95 զոհված զինծառայողների թվում։ Նա զոհվել է գլխի հատվածում ստացած բեկորային վնասվածքներից։
Հիշեցնենք, որ սեպտեմբերի 13-ին՝ ժամը 00:05-ից, Ադրբեջանի ԶՈւ ստորաբաժանումները սահմանի ողջ երկայնքով հրետանային միջոցներից, խոշոր տրամաչափի հրաձգային զինատեսակներից սկսել էին ինտենսիվ կրակ վարել հայկական դիրքերի ուղղությամբ՝ կիրառելով նաև ԱԹՍ-ներ: Հակառակորդը հարվածել է թե՛ ռազմական, թե՛ քաղաքացիական օբյեկտներին։