ԵՐԵՎԱՆ, 11 մայիսի – Sputnik. Հայ առաքելական եկեղեցու Տավուշի թեմի առաջնորդ, «Տավուշը հանուն հայրենիքի» շարժման առաջնորդ Բագրատ սրբազանը տեսաուղերձով դիմել է սփյուռքում բնակվող հայրենակիցներին։
Ավելի վաղ հայտնի էր դարձել, որ Եվրոպական 11 երկրի շուրջ 30 քաղաքում մայիսի 12-ից տեղի կունենան ցույցեր ի աջակցություն «Տավուշը հանուն հայրենիքի» շարժման։
«Շատ ուրախ եմ, որ դուք ձեր անհամաձայնությունն եք հայտնում Հայաստանի կառավարության ձեռնարկած գործունության նկատմամբ, որով մեր հայրենիքի տարածքներից միակողմանի զիջումներ են տեղի ունենում մեր թշնամուն այս պարագայում` Տավուշում, հետագայում` Սյունիքում, Գեղարքունիքում, Ջերմուկում։ Մենք նույնիսկ չգիտենք, թե որտեղ է սահմանփակվելու այս ամբողջ ընթացքը»,-նշել է սրբազանը։
Նա կոչ է արել միանալ պայքարին աջակցող հանրահավաքներին, որոնք կլինեն ամենուր՝ հյուսիսից հարավ, արևմուտքից արևելք, որով մեծ ուժ ու եռանդ են հաղորդելու Հայաստանի ժողովրդին և այս շարժմանը։
«Դուք էլ մոլորված ու խոցված վիճակում եք գտնվում, որքան ապաքինվի հայրենիքը, այնքան ու ավելի ապաքինում կստանաք դուք։ Շնորհակալ եմ ձեզ, աստված օրհնի ձեզ, և սպասում ենք Հայաստանում՝ ազատագրված ու հաղթանակած Հայաստանում»,-ասել է նա։
Հիշեցնենք` «Տավուշը հանուն հայրենիքի» շարժման կողմնակիցները Տավուշի թեմի առաջնորդ Բագրատ արքեպիսկոպոս Գալստանյանի գլխավորությամբ Կիրանցից երթով եկել են Երևան` միակողմանի սահմանազատման գործընթացը կասեցնելու նպատակով։
Մայիսի 9-ին երթի մասնակիցները հասան Երևանի Հանրապետության հրապարակ, որտեղ մեծ հանրահավաք անցկացվեց։ Շարժման առաջնորդ Բագրատ սրբազանը ՀՀ վարչապետ Նիկոլ Փաշինյանին մեկ ժամ ժամանակ տվեց հրաժարականի համար, ինչը տեղի չունեցավ։
Դրանից հետո նա կոչ արեց մայիսի 10-ից անհնազանդության խաղաղ ակցիաներ սկսել ամբողջ հանրապետությունում։