Ռուբեն Վարդանյանն ուղերձ է հղել Բաքվի բանտից

ԵՐԵՎԱՆ, 10 մայիսի – Sputnik․ Արցախի նախկին պետնախարար Ռուբեն Վարդանյանն ուղերձ է հղել Բաքվի բանտից։ Վարդանյանի կինը՝ Վերոնիկա Զոնաբենդը, ուղերձն ընթերցել է «Ավրորա 2024» մրցանակաբաշխության ժամանակ։

Նա ներկայացրել է պատմությունը, թե ինչպես ծնվեց «Ավրորան»․ գիտակցումից, որ պետք է երախտագիտություն հայտնել բոլոր նրանց, ովքեր օգնել են մեր պապերին ու տատերին, փրկել են կյանքեր: Ռուբեն Վարդանյանի խոսքով՝ իրենք ցանկանում էին փոխել հայկական նարատիվը՝ զոհի կերպարից ու անցյալի հիշողությունից դեպի նոր՝ ապագային հույսով նայելու հեռանկարի:

«Մենք երազում էինք, որ Երևանը դառնա աշխարհի մարդասիրական մայրաքաղաքը, և որ մենք միավորվեինք՝ ցեղասպանության հետևանքով աշխարհով մեկ սփռված հայկական սփյուռքի հետ դառնալով միասնական ազգ»,- նշել է Վարդանյանը։

Նրա խոսքով՝ «Ավրորայի» շնորհիվ հանդիպել է մարդկանց, որոնք սովորեցրին ամենակարևոր դասը՝ հավատարիմ մնալ մարդկային արժեքներին և սեփական սկզբունքներին՝ անկախ իրավիճակից, և անցնել քո ճանապարհը:

Վարդանյանը շեշտել է, որ Արցախ տեղափոխվելու որոշումը կայացրել է «Ավրորայի» հերոսների շնորհիվ՝ որոշելով լինել այն մարդկանց կողքին, որոնք օգնության կարիք ունեին: Արդեն 8 ամիս արտաքին աշխարհից գրեթե ամբողջովին մեկուսացված Ռուբեն Վարդանյանը վստահեցրել է, որ չի զղջում այդ ճանապարհն ընտրելու համար։

Բարերարը դիմել է «Ավրորայի» հերոսներին՝ նշելով, որ ուրիշներին օգնելու նրանց հանձնառությունն իրեն ուժ է տալիս նաև այսօր Բաքվի բանտում:

Հիշեցնենք` ադրբեջանցի սահմանապահները 2023 թվականի սեպեմբերի վերջին ձերբակալեցին Արցախի նախկին պետնախարար, բարերար Ռուբեն Վարդանյանին, ՊԲ նախկին հրամանատար Լևոն Մնացականյանին, ՊԲ հրամանատարի նախկին տեղակալ Դավիթ Մանուկյանին, Արցախի նախկին արտգործնախարար Դավիթ Բաբայանին, ԼՂ ԱԺ նախագահ Դավիթ Իշխանյանին, Արցախի նախկին նախագահներ Արկադի Ղուկասյանին, Բակո Սահակյանին, Արայիկ Հարությունյանին։