ԵՐԵՎԱՆ, 9 մայիսի – Sputnik․ Խաղաղությունն ու հաղթանակն ապրեցնող արժեքներ են, ապրելու և զարգանալու կարևոր երաշխիք ժողովրդի ու պետության համար։ Այսպես է ՀՀ չորրորդ նախագահ Արմեն Սարգսյանը շնորհավորել Մայիսի 9-ը` նշելով, որ այս տոնը մեր պատմության անբաժանելի մասն է։
«Ապագա հաղթանակների և կայուն ու արժանապատիվ խաղաղության գրավականը մեր միասնականությունն է, համերաշխությունն ու նպատակասլացությունը, հավատարմությունը համազգային նպատակներին»,- նշված է նրա շնորհավորական ուղերձում
4-րդ նախագահը հավելել է, որ հերոսների հիշատակն ու թողած ժառանգությունը պարտավորեցնում են լինել միասնական և համատեղ ջանքերով, որպես ժողովուրդ ու պետություն, կերտել հաղթանակներ:
Օրվա առիթով կարճ գրառում է կ արել նաև ՀՀ երկրորդ նախագահ Ռոբերտ Քոչարյանը։
«Շնորհավոր մայիսի 9»,– գրել է նա ֆեյսբուքյան էջում։
Ավելի վաղ ուղերձ էր հղել նաև ՀՀ երրորդ նախագահ Սերժ Սարգսյանը՝ նշելով, որ վերստին կհաղթենք, եթե ամենից առաջ սիրենք մեր հայրենիքը։
Հիշեցնենք` այսօր Հայրենական մեծ պատերազմում ֆաշիզմի նկատմամբ տարած հաղթանակի 79-րդ տարեդարձն է։ Տարիներ շարունակ մայիսի 9-ը Հայաստանում եռատոն է եղել` Երկրորդ համաշխարհային պատերազմում խորհրդային ժողովուրդների տարած հաղթանակի, Արցախի պաշտպանության բանակի ստեղծման և 1992թ-ի Շուշիի ազատագրման օրը: