«Զինվորի տան» տղաները Մոսկվայում մասնակցելու են 20-րդ համաշխարհային պարային օլիմպիադային։ Այս մասին ֆեյսբուքյան իր էջում հայտնում է «Զինվորի տան» լրատվության և հանրային կապերի բաժնի ղեկավար Ռուզաննա Վարդերեսյանը։
Մեր երկիրը ներկայացնելու են Արշակ Հովհաննիսյանն ու Վարդան Վարդանյանը։ Արշակի երկու ոտքերն ամպուտացրել են դեռ 1994 թվականին՝ Արցախյան առաջին պատերազմի ժամանակ, երբ նա 20 տարեկան էր։
Վարդան Վարդանյանն էլ տեղաշարժվում է անվասայլակով։ Նա ծանր վիրավորում է ստացել 2020 թվականի հոկտեմբերի 10-ին Ջաբրայիլում ԱԹՍ-ի հարվածից։
«Զվարթնոց» օդանավակայանում Մոսկվա մեկնելուց առաջ տղաները պատմում են իրենց տրամադրության և տրամադրվածության մասին։
«Տան պատին արդեն մեխը մեխել եմ, որ մեդալը կախելու տեղ լինի»,- ասում է Արշակը։
Վարդանն էլ հավելում է, որ լավ են տրամադրված և հույս ունեն, որ հաղթանակով են վերադառնալու։