ԵՐԵՎԱՆ, 2 մայիսի – Sputnik. Տավուշի մարզի Կիրանց գյուղում արդեն մոտ մեկ ժամ է` հոսանք չկա։ Տեղեկությունը հայտնում է «Տավուշը հանուն հայրենիքի» նախաձեռնությունը։
Նշվում է, որ տեղեկությունը հայտնել է Տավուշի մարզի բնակիչ Կարեն Ղազարյանը։
«Գյուղի բնակիչները կարծում են, որ դա արվում է միտումնավոր՝ մարդկանց վրա հոգեբանական ճնշում գործադրելու նպատակով»,– ասված է հաղորդագրությունում։
Նշենք, որ արդեն 2 շաբաթ է` տավուշեցիները պայքարում են Ադրբեջանին միակողմանի տարածքներ զիջելու դեմ։
Ավելի վաղ հայտնել էինք, որ մեծաքանակ ոստիկանական ուժեր են կուտակվել ՀՀ Տավուշի մարզի Կիրանց գյուղի տարածքում, նրանք փակել են գյուղի մուտքերը: Sputnik Արմենիային ՆԳՆ մամուլի ծառայությունից հայտնել էին, որ 31 քաղաքացի է տարվել Տավուշի մարզի ոստիկանության տարածքային բաժին։ Ավելի ուշ հայտնի դարձավ, որ Կիրանցում բերման ենթարկված բոլոր քաղաքացիներն ազատ են արձակվել։ Նրանք ոստիկանությունից դուրս գալուց հետո պատմել էին, որ ոստիկանները, բիրտ ուժ կիրառելով են իրենց բերման ենթարկել։
ՆԳՆ–ն վստահեցնում է, որ Կիրանցից ոստիկանության բաժին տարված անձանցից ոչ ոք ծեծի չի ենթարկվել։