ԵՐԵՎԱՆ, 1 մայիսի – Sputnik․ ՀՀ կառավարությունից Կիրանցի համայնքային ղեկավար Կամո Շահինյանին 60% երաշխիք են տվել, որ գյուղի որևէ տուն չի հայտնվի Ադրբեջանի տարածքում:
«ՀՀ կառավարությունից ինձ ասել են` գնացեք ժողովրդին ասեք, որ իրենք 60% երաշխավորում են, որ գյուղի որևէ տուն չի հայտնվի Ադրբեջանի տարածքում»,–ասաց նա:
Նրա խոսքով` խոստացել են, որ երկու կողմերը հենց սահմանազատում անեն, ժողովրդի կարծիքը հաշվի կառնեն. ինչպես անել, որ իրենց տներին չխանգարի ։
«Ինձ կառավարությունից այսքան բան են ասել, մնացածը ձեր բոլորի գործն է, դուք եք որոշում թե հետո ինչ պետք է անեք, ես էլ ձեզ հետ»,–ասաց Կիրանցի համայնքային ղեկավարը։
Նա ընդգծեց, որ նախնական հաշվարկով, սահմանազատումից հետո Ադրբեջանին էր անցնում 2 տուն, բայց ևս 8-9 տուն շատ մոտ է այդ սահմանին։
Միաժամանակ համայնքապետն ընդգծեց, որ նա այժմ հայտարարում է միայն այն, ինչ իրեն ասել են, սակայն ոչ մի երաշխիք չի կարող տալ։
«Բնակիչները շատ արդար պահանջ ունեն, բնակիչներին թող որևէ մեկը չթերագնահատի։ Հայաստանի Հանրապետությանն էլ ասում ենք, որ այն, ինչ մենք տեսել ենք, այն, ինչ հիշում ենք, այստեղ մեր պապական հողերը սեփականաշնորհված են եղել... Քոմենթներ են գրում, թե կիրանցեցիք ինչի են զոմբիացել, ինչի չեն ուզում սահմանազատումը նորմալ լինի, խաղաղ լինի, էդ չի, ժողովուրդ ջան, ես չեմ ուզում 1 սմ հող տալ ադրբեջանցուն, որ ինձ ճանաչող ադրբեջանցին գա ինձ վրա ծիծաղի»,–ասաց համայնքի ղեկավարը։
Հիշեցնենք` Հայաստանի և Ադրբեջանի սահմանազատման հարցերով հանձնաժողովներն ապրիլի 19-ին պայմանավորվել են սահմանազատումը սկսել Տավուշի մարզից։ Սահմանագծի տվյալ հատվածների նկարագրությունը կազմվելու է` հաշվի առնելով տեղանքում գեոդեզիական չափումների արդյունքում կատարված կոորդինատների հստակեցումը, որը պետք է ավարտվի մինչև 2024 թ. մայիսի 15-ը:
ՀՀ վարչապետի աշխատակազմը հայտարարել է, որ Ադրբեջանն այս ամենի արդյունքում 2.5 գյուղ է ստանում, իսկ Հայաստանի Հանրապետությունը` անվտանգային ռիսկերի նվազեցում։ Կիրանց գյուղի հատվածում ճանապարհի մի քանի հարյուր մետրանոց հատվածի փոփոխություն կարվի, իսկ Ոսկեպարը ճանապարհի խնդիր չի ունենա։ Սահմանազատումից հետո չորս գյուղերի հատվածում զինված ուժերը հետ կքաշվեն և իրենց տեղը կզիջեն սահմանապահ զորքերին:
Տավուշի սահմանամերձ գյուղերի բնակիչներն ապրիլի 19-ից բողոքի ակցիաներ են անում Հայաստան-Վրաստան միջպետական ճանապարհին: Նրանք դեմ են սահմանազատման այն տարբերակին, որը համաձայնեցրել են Երևանն ու Բաքուն։
Չնայած այդ ամենին` հայ–ադրբեջանական սահմանին արդեն 35 սահմանային սյուն է տեղադրվել։