ԵՐԵՎԱՆ, 30 ապրիլի – Sputnik. Թուրքիայում դրական տոնայնություն են տեսնում Հայստանի և Ադրբեջանի միջև իրականացվող գործընթացում։ Այս մասին հայտարարել է երկրում իշխող «Արդարություն և զարգացում» կուսակցության պաշտոնական ներկայացուցիչ Օմեր Չելիքը:
Նա նշել է, որ Անկարան ուշադիր հետևում է հայ-ադրբեջանական սահմանի մասին համաձայնագրի շուրջ գործընթացի զարգացմանը։
«Անկախ մեր օրակարգից, մենք ուշադիր հետևում ենք Ադրբեջանի հետ կապված հարցերին։ Ադրբեջանի և Հայաստանի սահմանային հարցերով պատվիրակությունները հանդիպել են 8-րդ անգամ։ Սահմանին սահմանաքար է տեղադրվել, թեև խորհրդանշական։ Մենք ողջունում ենք ներդրումը տարածաշրջանում խաղաղության ամրապնդման և Ադրբեջանի վրա հարձակումներից հրաժարվելու գործում»,- հայտարարել է Չելիքը։
Հիշեցնենք` Հայաստանի և Ադրբեջանի սահմանազատման հարցերով հանձնաժողովներն ապրիլի 19-ին պայմանավորվել են սահմանազատումը սկսել Տավուշի մարզից։ Սահմանագծի տվյալ հատվածների նկարագրությունը կազմվելու է` հաշվի առնելով տեղանքում գեոդեզիական չափումների արդյունքում կատարված կոորդինատների հստակեցումը, որը պետք է ավարտվի մինչև 2024 թ. մայիսի 15-ը:
ՀՀ վարչապետի աշխատակազմը հայտարարել է, որ Ադրբեջանն այս ամենի արդյունքում 2.5 գյուղ է ստանում, իսկ Հայաստանի Հանրապետությունը` անվտանգային ռիսկերի նվազեցում։ Կիրանց գյուղի հատվածում ճանապարհի մի քանի հարյուր մետրանոց հատվածի փոփոխություն կարվի, իսկ Ոսկեպարը ճանապարհի խնդիր չի ունենա։ Սահմանազատումից հետո չորս գյուղերի հատվածում զինված ուժերը հետ կքաշվեն և իրենց տեղը կզիջեն սահմանապահ զորքերին:
Տավուշի սահմանամերձ գյուղերի բնակիչներն ապրիլի 19-ից բողոքի ակցիաներ են անում Հայաստան-Վրաստան միջպետական ճանապարհին: Նրանք դեմ են սահմանազատման այն տարբերակին, որը համաձայնեցրել են Երևանն ու Բաքուն։
Չնայած այդ ամենին` հայաստան–Ադրբեջան սահմանին արդեն 35 սահմանային սյուն է տեղադրվել։