ԵՐԵՎԱՆ, 30 ապրիլի – Sputnik. Հայաստանի և Ադրբեջանի արտգործնախարարների` Ղազախստանում նախատեսված բանակցությունների օրը դեռ որոշված չէ, քանի որ Երևանը դեռևս չի արձագանքել այդ առաջարկին։ Այս մասին ՌԻԱ Նովոստիին հայտնել է Ղազախստանի փոխարտգործնախարար Ալիբեկ Բակաևը Կենտրոնական Ասիայի և Ադրբեջանի հետ տնտեսության և համագործակցության արաբական ֆորումի երրորդ նստաշրջանի շրջանակում։
Ավելի վաղ Ղազախստանի ԱԳՆ ներկայացուցիչ Այբեկ Սմեդյարովը Աստանայում ճեպազրույցում հաստատել էր, որ նման բանակցություններ իսկապես նախատեսվում են Ալմաթիում, և ղազախական կողմն այժմ կապի մեջ է Ադրբեջանի և Հայաստանի գործընկերների հետ։ Միաժամանակ նա նշել էր, որ ենթադրվում է` բանակցությունները կանցկացվեն բացառապես այդ երկու կողմերի միջև, Աստանայի միջնորդության մասին խոսք չկա։
«Որքան ինձ հայտնի է, հանդիպման ամսաթիվը դեռ որոշված չէ, քանի որ Հայաստանը դեռ չի տվել իր համաձայնությունը, բայց ակնկալում ենք, որ այդ բանակցությունները կկայանան», - ասել է Բակաևը:
Նրա խոսքով` պատահական չէ, որ Ղազախստանը Երևանին և Բաքվին առաջարկել է հարթակ լինել այդ բանակցությունների համար, քանի որ երկրի միջնորդական դերը Լեռնային Ղարաբաղի խնդրի լուծման գործում հայտնի է դեռևս անցյալ դարի 90-ական թվականներից:
Հիշեցնենք` ապրիլի 29–ին ՀՀ ԱԳՆ մամուլի քարտուղար Անի Բադալյանը հաստատեց, որ կա Հայաստանի և Ադրբեջանի նախարարների հանդիպման պայմանավորվածություն՝ ղազախական կողմի առաջարկով. հստակեցված է, որ այն կանցնի Ալմաթիում։