ԵՐԵՎԱՆ, 25 ապրիլի – Sputnik. Ալեն Սիմոնյանի հայտարարությունը չի բխում ՀՀ շահերից, քանի որ Ուկրաինայի պատճառով իմաստ չունի Ռուսաստանի հետ հարաբերությունները լարել։ Sputnik Արմենիայի հետ զրույցում այս մասին ասել է միջազգայնագետ Գրիգոր Բալասանյանը` անդրադառնալով ԱԺ նախագահի` Իսպանիայում արած հայտարարությունը։
Ապրիլի 22-ին Իսպանիայում ԵՄ անդամ պետությունների խորհրդարանների նախագահների համաժողովում Ալեն Սիմոնյանն իր ելույթումՌուսաստանին մեղադրել էր Հայաստանի դեմ սպառնալիքների և ապատեղեկատվության արշավ կազմակերպելու համար։ Նա նաև հայտարարել էր, որ ՌԴ–ն ներխուժել է Ուկրաինա, և որ Հայաստանը հաստատակամորեն պաշտպանում է Ուկրաինայի տարածքային ամբողջականությունը: Ապրիլի 24-ին ՌԴ Դաշնային խորհրդի ղեկավար Վալենտինա Մատվիենկոն հայտարարել է, որ Դաշնային խորհուրդը հարցում կուղարկի Հայաստանի Ազգային ժողով՝ պարզելու օրենսդիրների դիրքորոշումը խոսնակ Ալեն Սիմոնյանի՝ Ռուսաստանի հասցեին հնչեցրած մեղադրանքների վերաբերյալ։
«Ալեն Սիմոնյանն իր հայտարարության մեջ, կարծում եմ, մի փոքր թերացել է և չի նշել, թե որ Ուկրաինայի տարածքային ամբողջականությունն է պաշտպանում։ Որովհետև կա էական տարբերություն 1991թ–ի և 2022թ–ի Ուկրաինայի միջև։ Ավելին` Ուկրաինայի նախագահ Զելենսկին ինքն է ՌԴ–ին հիմա առաջարկում բանակցություններ սկսել 2022թ–ի փաստացի սահմանների դրությամբ։ Այսինքն` ուկրաինացիներն իրենք են արդեն հասկանում, որ Ղրիմն ու Դոնբասը անվերադարձ պոկվել են իրենցից»,– ասում է Բալասանյանը` նկատելով, որ նման հայտարարություններ անելիս պետք է շատ զգույշ լինել` անհարմար վիճակում չհայտնվելու համար։
Գրիգոր Բալասանյան
© Sputnik / Aram Nersesyan
Ինչ վերաբերում է ՌԴ–ի` Ուկրաինա ներխուժելու մասին հայտարարությանը, միջազգայնագետը դա գնահատում է որպես ՀՀ իշխող կուսակցության կարծիք` ընդգծելով, որ այն չի համապատասխանում ՀՀ հանրության մեծ մասի տեսակետի հետ։
«Իմ խորին համոզմամբ` Հայաստանը ՀԱՊԿ–ից դուրս չի գալու, և նման հայտարարությունները վնասում են հայ–ռուսական հարաբերություններին»,– շեշտում է Բալասանյանը։
Միջազգայնագետը կարծում է, որ պետության երրորդ դեմքին հարիր չէ նման հարցեր բարձրացնելը, հատկապես, երբ դա իր մասնագիտական շրջանակներում չէ։ Եվ պետական պաշտոնյան չպիտի իր սեփական կարծիքը ներկայացնի պետության անունից ու առավել ևս` «փաթաթի պետության վզին»։
Մեր զրուցակցի համոզմամբ` Մատվիենկոյի երեկվա հայտարարությունը պայմանավորված էր հենց այս հանգամանքով, և ԱԺ նամակը ուղարկվում է հատկապես պարզելու` դա Ալեն Սիմոնյանի անձնական տեսակե՞տն է, թե՞ ԱԺ պատգամավորների դիրքորոշումը։
Ինչ վերաբերում է ստեղծված իրավիճակի հնարավոր հանգուցալուծմանը, Բալասանյանը ենթադրում է, որ ՌԴ–ից հերթական նամակը հազիվ թե ՀՀ իշխանությունների համար սթափեցնող լինի, և դրա րդյունքում ՔՊ–ի պատգամավորների անհեռատես հայտարարություններն ու հռետորաբանույունը հազիվ թե փոխվեն։
Նշենք, որ ի պատասխան Sputnik Արմենիայի հարցման ԱԺ-ից հայտնել են, որ Ռուսաստանի Դաշնային ժողովից առայժմ որևէ գրություն չեն ստացել։