ԵՐԵՎԱՆ, 25 ապրիլի – Sputnik. Լեհաստանը պատրաստ է օգնել Ուկրաինային վերադարձնել զորակոչային տարիքի տղամարդկանց, որոնք երկրից հեռացել են ռազմական հատուկ գործողության մեկնարկից հետո։ Այս հայտարարությունն արել է Լեհաստանի պաշտպանության նախարար Վլադիսլավ Կոսինյակ Կամիշը։
«Կարծում եմ՝ լեհերից շատերին զայրացնում է, երբ նրանք հյուրանոցներում ու սրճարաններում տեսնում են երիտասարդ ուկրաինացի տղամարդկանց ու լսում, թե որքան ջանք պիտի ներդնենք Ուկրաինային օգնելու համար», - նրա խոսքը մեջբերում է «Reuters» գործակալությունը:
Կամիշը չի ասել, թե ինչպես պաշտոնական Վարշավան ինչպես կարող է օգնել Կիևին` նշելով, որ ցանկացած օգնություն հնարավոր է:
Նշենք, որ Ուկրաինայի «Դոկումենտ» պետական ձեռնարկությունը ապրիլի 23-ին հայտարարեց, որ «տեխնիկական պատճառներով» դադարեցրել է արտասահմանյան ստորաբաժանումներում պատրաստի փաստաթղթերի տրամադրումը: Տեղական ԶԼՄ-ները գրեցին, որ Ուկրաինայի ԱԳՆ-ն արտասահմանյան դիվանագիտական հաստատությունների ղեկավարներին փաստաթուղթ է ուղարկել՝ պահանջելով ապրիլի 23-ից դադարեցնել բոլոր հյուպատոսական գործողությունները Ուկրաինայի` զորակոչային տարիքի քաղաքացիների նկատմամբ` բացի Ուկրաինա վերադառնալու համար անձը հաստատող փաստաթղթի ձևակերպումից: Ուկրաինայի արտաքին գործերի նախարար Դմիտրի Կուլեբան ավելի ուշ հաստատեց, որ Ուկրաինայի քաղաքացի հանդիսացող և արտերկրում գտնվող զինապարտ տղամարդկանց համար դադարեցվել են հյուպատոսական ծառայությունները:
Հիշեցնենք` Վլադիմիր Զելենսկին Ուկրաինայում զորահավաքի խստացման մասին օրենք է ստորագրել, որն ուժի մեջ կմտնի մայիսի 18-ին: Փաստաթուղթը պարտավորեցնում է բոլոր զինապարտներին 60 օրվա ընթացքում թարմացնել իրենց տվյալները զինկոմիսարիատում: Դրա համար պետք է ներկայանալ զինկոմիսարիատ կամ գրանցվել «զորակոչիկի էլեկտրոնային գրասենյակում», որի միջոցով կարող է տրվել նաև ծանուցագիր: Ծանուցագիրը կհամարվի հանձնված, նույնիսկ եթե զորակոչիկն անձամբ չի տեսել այն. ծանուցագրի «հանձնման» ամսաթիվ կհամարվի այն օրը, երբ փաստաթղթում դրոշմակնիք կդրվի անձնական հանձնման անհնարինության մասին: