Ինչու քաղաքագետ Սուրեն Պետրոսյանն ազատ չի արձակվել. ՄԻՊ–ի պարզաբանումը

ԵՐԵՎԱՆ, 24 ապրիլի – Sputnik. ՀՀ մարդու իրավունքների պաշտպանի գրասենյակի աշխատակիցները այցելել են քաղաքագետ Սուրեն Պետրոսյանին, որը Տավուշում բերման է ենթարկվել ու տեղափոխվել Երևան։ Տեղեկությունը հայտնեց ՀՀ մարդու իրավունքների պաշտպան Անահիտ Մանասյանը` Ծիծեռնակաբերդի հուշահամալիրում պատասխանելով լրագրողների հարցերին։

Երեկ տեղեկացրել էինք, որ Տավուշում ոստիկանները սկսել են բերման ենթարկել «Տավուշը հանուն հայրենիքի» նախաձեռնության անդամներին։ Բերման են ենթարկվել քաղաքագետ Սուրեն Պետրոսյանը, պահեստազորի գնդապետ Միհրան Մախսուդյանը, նաև շարժման անդամ Միքայել Մարտիրոսյանը։

Ավանեսյանը նշեց, որ Սուրեն Պետրոսյանի բարձրաձայնած բոլոր խնդիրներն արձանագրել են։ ՄԻՊ–ն իր աշխատակիցներին հանձնարարել է, որ ՁՊՎ–ում պահման ժամկետը լրանելուց հետո նորից այցելեն նրան, որպեսզի կարողանան երաշխավորել պատշաճ ազատ արձակումը։

Մանասյանը տեղեկացրեց, որ ՄԻՊ–ի արագ արձագանքման խումբն այս պահին էլ Տավուշում է ու իրականացնում է քաղաքացիների իրավունքների պաշտպանություն։

Հիշեցնենք` Հայաստանի և Ադրբեջանի սահմանազատման հարցերով հանձնաժողովներն ապրիլի 19-ին պայմանավորվել են սահմանազատումը սկսել Տավուշի մարզից։ Սահմանագծի տվյալ հատվածների նկարագրությունը կազմվելու է` հաշվի առնելով տեղանքում գեոդեզիական չափումների արդյունքում կատարված կոորդինատների հստակեցումը, որը պետք է ավարտվի մինչև 2024 թ. մայիսի 15-ը:

ՀՀ վարչապետի աշխատակազմը հայտարարել է, որ Ադրբեջանն այս ամենի արդյունքում 2.5 գյուղ է ստանում, իսկ Հայաստանի Հանրապետությունը` անվտանգային ռիսկերի նվազեցում։ Կիրանց գյուղի հատվածում ճանապարհի մի քանի հարյուր մետրանոց հատվածի փոփոխություն կարվի, իսկ Ոսկեպարը ճանապարհի խնդիր չի ունենա։ Սահմանազատումից հետո չորս գյուղերի հատվածում զինված ուժերը հետ կքաշվեն և իրենց տեղը կզիջեն սահմանապահ զորքերին:

Տավուշի սահմանամերձ գյուղերի բնակիչներն ապրիլի 19-ից բողոքի ակցիաներ են անում Հայաստան-Վրաստան միջպետական ճանապարհին: Նրանք դեմ են սահմանազատման այն տարբերակին, որը համաձայնեցրել են Երևանն ու Բաքուն։