Եթե չսթափվենք, կբռնենք գաղթի ճամփան. Բերդի հոգևոր հովիվը տավուշցիների կողքին է

ԵՐԵՎԱՆ, 24 ապրիլի – Sputnik. Եթե Արցախը կորցնելուց հետո էլ հայ ժողովուրդը չսթափվի, չհասկանա, որ թշնամին կանգ չի առնելու, քանի այս հողի վրա հայ կա, վերջը լինելու է գաղթի ճանապարհ բռնելը։ Այս մասին Sputnik Արմենիայի հետ զրույցում ասաց Բերդի տարածաշրջանի հոգևոր հովիվ Տեր Արամ քահանա Միրզոյանը, որն այս օրերին ակցիաներ անող տավուշցիների կողքին է։

Նա վստահ է, որ հայ ժողովուրդը պետք է այդ ուժն իր մեջ գտնի համախմբվելու հայրենիքը պաշտպանելու ճանապարհին։

«Մեր հայրենիքն այնքան է փոքրացել, մի սրտի չափ է դարձել։ Որտեղից էլ խոցեն, հարվածը մահացու է։ Այնպես չէ, որ սա կիրանցու կամ ոսկեպարցու սահմանն է, սա ողջ հայության սահմանն է, և բոլորը հավասարապես պետք է պատասխանատվություն կրեն»,–ասաց Տեր Արամը։

Նա ցավով նշեց, որ հայ ժողովրդին ինչ–որ բան պակասում է վճռական պահին համախմբվելու համար

Հոգևորականի խոսքով` հայ ազգի նվիրյալները պետք է ոտքի կանգնեն ու նոր հաղթական պատմություն կերտեն։

Հիշեցնենք` Հայաստանի և Ադրբեջանի սահմանազատման հարցերով հանձնաժողովներն ապրիլի 19-ին պայմանավորվել են սահմանազատումը սկսել Տավուշի մարզից։ Սահմանագծի տվյալ հատվածների նկարագրությունը կազմվելու է` հաշվի առնելով տեղանքում գեոդեզիական չափումների արդյունքում կատարված կոորդինատների հստակեցումը, որը պետք է ավարտվի մինչև 2024 թ. մայիսի 15-ը:

ՀՀ վարչապետի աշխատակազմը հայտարարել է, որ Ադրբեջանն այս ամենի արդյունքում 2.5 գյուղ է ստանում, իսկ Հայաստանի Հանրապետությունը` անվտանգային ռիսկերի նվազեցում։ Կիրանց գյուղի հատվածում ճանապարհի մի քանի հարյուր մետրանոց հատվածի փոփոխություն կարվի, իսկ Ոսկեպարը ճանապարհի խնդիր չի ունենա։ Սահմանազատումից հետո չորս գյուղերի հատվածում զինված ուժերը հետ կքաշվեն և իրենց տեղը կզիջեն սահմանապահ զորքերին:

Տավուշի սահմանամերձ գյուղերի բնակիչներն ապրիլի 19-ից բողոքի ակցիաներ են անում Հայաստան-Վրաստան միջպետական ճանապարհին: Նրանք դեմ են սահմանազատման այն տարբերակին, որը համաձայնեցրել են Երևանն ու Բաքուն։