Պետք է փոքր քայլերով վստահություն ձևավորել Բաքվի հետ. Վարդանյանը` սահմանազատման մասին

ԵՐԵՎԱՆ, 22 ապրիլի – Sputnik. Երևանն ուզում է փոքր քայլերով վստահության մթնոլորտ ստեղծել Բաքվի հետ, և Տավուշում սահմանազատման գործընթացը համապատասխանում է այդ տրամաբանությանը։ Այս մասին ԱԺ–ում լրագրողների հետ զրույցում ասաց ՔՊ-ական պատգամավոր, պետական և իրավական հարցերի հանձնաժողովի նախագահ Վլադիմիր Վարդանյանը` անդրադառնալով հարցին, թե ինչու Ադրբեջանը չի հեռանում Հայաստանի օկուպացված տարածքներից, օրինակ` նաև Ջերմուկից, և ինչու է որոշվել սահմանազատումը սկսել հենց Տավուշից։

Նրա խոսքով` փոքր քայլերի միջոցով փոխադարձ վստահությունը շատ ավելի կարևոր է, քան ինչ-որ դարակազմիկ որոշումներ կայացնելը։ Ըստ ՔՊ–ական պատգամավորի` պետք է փորձել գտնել այն հատվածները (սահմանները), որտեղ կարելի է հասնել կոնսենսուսի և շարունակել առաջ շարժվել, քանի որ իրական քաղաքականությունը հենց դրա վրա է կառուցվում։

Վարդանյանը վստահեցրեց` որևէ մեկը չի ցանկանում թշնամուն բերել Հայաստանի Հանրապետության տարածք։

Հիշեցնենք` Հայաստանի և Ադրբեջանի սահմանազատման հարցերով հանձնաժողովներն ապրիլի 19-ին պայմանավորվել են սահմանազատումը սկսել Տավուշի մարզից։ Սահմանագծի տվյալ հատվածների նկարագրությունը կազմվելու է` հաշվի առնելով տեղանքում գեոդեզիական չափումների արդյունքում կատարված կոորդինատների հստակեցումը, որը կձևակերպվի համապատասխան արձանագրություն-նկարագրությամբ, ինչը կողմերի միջև պետք է համաձայնեցվի ու ստորագրվի մինչև 2024 թ. մայիսի 15-ը:

ՀՀ վարչապետի աշխատակազմը հայտարարել է, որ Ադրբեջանն այս ամենի արդյունքում 2.5 գյուղ է ստանում, իսկ Հայաստանի Հանրապետությունը` սահմանազատման հետ կապված և անվտանգային ռիսկերի նվազեցում։ Կիրանց գյուղի հատվածում ճանապարհի մի քանի հարյուր մետրանոց հատվածի փոփոխություն կարվի, իսկ Ոսկեպարը ճանապարհի խնդիր չի ունենա։ Սահմանազատումից հետո չորս գյուղերի հատվածում զինված ուժերը հետ կքաշվեն և տեղը կզիջեն սահմանապահ զորքերին:

Տավուշի սահմանամերձ գյուղերի բնակիչներն ապրիլի 19-ից բողոքի ակցիա են անում Հայաստան-Վրաստան միջպետական ճանապարհին: Նրանք դեմ են սահմանազատման այն տարբերակին, որը համաձայնեցրել են Երևանն ու Բաքուն։ Ճանապարհը փակ է։