ԵՐԵՎԱՆ, 22 ապրիլի – Sputnik. ՀՀ–ում անձնական տվյալների պաշտպանության առնչությամբ հանրային գրագիտությունը բավարար մակարդակի վրա չէ։ Այս մասին լրագրողների հետ զրույցում ասաց ՀՀ մարդու իրավունքների պաշտպան Անահիտ Մանասյանը` խոսելով անձնական տվյալների պաշտպանության և անվտանգ համացանցի մասին։
Մանասյանը լրագրողների հետ զրույցում շեշտեց, որ ոլորտում խնդիրները բազմաթիվ են, սկսած անձնական տվյալների մասով անձանց կողմից ոչ պատշաճ պատկերացումներից, մինչև ԶԼՄ–ների ու պետական կառույցների ներկայացուցիչների ոչ բավարար գիտելիքներ։ Խոսքը զգայուն թեմաներին է վերաբերում` սեռական ազատության և անձեռնմխելիությանն ուղղված հանցագործություններին։ Շատ դեպքերում տուժող դարձած անձանց տվյալները մանրամասն հրապարակվում են, ու հաճախ հնարավոր է անձին նույնականացնել։ Արդյունքում անձը կրկնակի տուժող է դառնում։
Մանասյանն ընդգծեց, որ հաճախ ծնողները երեխաներին ակամա թիրախավորում են, երբ հրապարակում են նրանց անհատականացնող տվյալներ։
«Երբ երեխայի մասին տվյալներ են հրապարակվում, որտեղ պարզ է դառնում, թե երեխան ուր է գնացել, որ ժամին է գնացել, ինչ է արել, անվտանգության տեսանկյունից կարող են խնդիրներ առաջանալ։ Նման բովանդակությամբ տեսանյութեր և լուսանկարներ հրապարակելուց առաջ անհրաժեշտ է մի քանի անգամ մտածել հնարավոր հետևանքների մասին։ Ես չեմ խոսում, որ արգելված է որևէ լուսանկար կամ տեսանյութ հրապարակելը, բայց բոլոր ռիսկերն առնվազն պետք է գնահատել»,– Sputnik Արմենիայի հարցին ի պատասխան ասաց Մանասյանը։
Նրա խոսքով` հաջորդ խնդիրը բարեգործական միջոցառումներին է վերաբերում, որոնց արդյունքում երեխաների տվյալներ են ներկայացվում, նկարահանվում են ու ներկայացվում կոնկրետ ձևաչափով։ Ցույց են տալիս, որ անձը սոցիալապես անապահով խմբից է, ու այսպիսով նա դառնում է շատ խոցելի։ Մանասյանը շեշտեց, որ երբեմն այդ տվյալները հրապարակվում են առանց երեխաների և նրանց ծնողների իմացության ու համաձայնության։
Նրա պնդմամբ` նման դեպքերում երեխան ցանկացած միջավայրում կարող է դառնալ բուլինգի զոհ։
Ըստ ՄԻՊ–ի` այս ամենի դեմ պայքարի առաջին քայլը հանրային իրազեկման շատ լայն աշխատանքներ իրականացնելն է, քանի որ անձնական տյվալների պաշտպանության մասով հանրային գրագիտությունն ուղղակի բավարար չէ։