Ոստիկանները բացեցին Հայաստան-Վրաստան միջպետական ճանապարհը, որն առավոտից փակել էին տավուշցիները։
Ավելի վաղ հայտնել էինք, որ տավուշցիները Երևանի ու Բաքվի երեկվա պայմանավորվածություններից հետո բողոքի են դուրս են եկել և մինչև առավոտյան 05։30 եղել են Հայաստան–Վրաստան միջպետական ճանապարհին։ Ակցիան վերսկսվել էր այսօր առավոտյան։
Քիչ առաջ հայտնվեցին քաղաքացիներ, որոնք մոտեցան ակցիայի մասնակիցներին և հորդորեցին հեռանալ, ապա երկուշաբթի հանդիպել ՀՀ փոխվարչապետ Մհեր Գրիգորյանին (ղեկավարում է սահմանազատման հանձնաժողովը)։
Ճանապարհը փակած անձանց խոստացան, որ Գրիգորյանն այդ օրը կպատասխանի բոլոր հարցերին։ Այս պահին ճանապարհին են մնացել միայն այն մեքենաները, որոնց վարորդներին չի հաջողվել գտնել։ Ոստիկանները նույնիսկ փորձեցին ուժով տեղաշարժել դրանք, բայց չկարողացան։
Ճանապարհն արդեն բաց է
© Sputnik / Aram Nersesyan
Հիշեցնենք` Հայաստանի և Ադրբեջանի սահմանազատման հարցերով հանձնաժողովներն ապրիլի 19-ին պայմանավորվել են սահմանազատումը սկսել Տավուշի մարզից։ Սահմանագծի տվյալ հատվածների նկարագրությունը կազմվելու է` հաշվի առնելով տեղանքում գեոդեզիական չափումների արդյունքում կատարված կոորդինատների հստակեցումը, որը կձևակերպվի համապատասխան արձանագրություն-նկարագրությամբ, ինչը կողմերի միջև պետք է համաձայնեցվի ու ստորագրվի մինչև 2024 թ. մայիսի 15-ը:
ՀՀ վարչապետի աշխատակազմը հայտարարել է, որ Ադրբեջանն այս ամենի արդյունքում 2.5 գյուղ է ստանում, իսկ Հայաստանի Հանրապետությունը` սահմանազատման հետ կապված և անվտանգային ռիսկերի նվազեցում։ Կիրանց գյուղի հատվածում ճանապարհի մի քանի հարյուր մետրանոց հատվածի փոփոխություն կարվի, իսկ Ոսկեպարը ճանապարհի խնդիր չի ունենա։ Սահմանազատումից հետո չորս գյուղերի հատվածում զինված ուժերը հետ կքաշվեն և տեղը կզիջեն սահմանապահ զորքերին: