ԵՐԵՎԱՆ, 18 ապրիլի – Sputnik. Շատ հաճախ ՀՀ կառավարության աշխատակազմի համար դժվար է գտնել թարգմանիչներ` միջազգային հանդիպումները սպասարկելու համար։ Այս մասին ՀՀ կառավարության այսօրվա նիստի ժամանակ հայտարարեց վարչապետ Նիկոլ Փաշինյանը՝ դիմելով Բրյուսովի անվան պետական համալսարանի ռեկտոր Դավիթ Գյուրջինյանին, ում օրեր առաջ կայացած ընտրությունը հաստատվեց կառավարության նիստում։
«Բացառությամբ, թերևս, ամենատարածված լեզուների, մյուսների դեպքում մենք խնդիրներ ենք ունենում պրոֆեսիոնալ թարգմանիչներ գտնելու հարցում։ Այն աստիճանի խնդիր է դա, որ մենք չունենք բավարար թարգմանիչներ անգամ տարածաշրջանային լեզուների դեպքում», – նշեց նա։
Ի պատասխան Գյուրջինյանն ասաց, որ դժվարությունների հետ բախվում ենք անգամ հայերենի բարձր որակավորում ունեցող մասնագետներ փնտրելիս:
Ըստ նրա` հաճախ բարձրագույն կրթությունն ընդամենը ձևական բնույթ է կրում։
Գյուրջինյանը խոստացավ աշխատել կրթության մակարդակը պատշաճ մակարդակի բարձրացնելու ուղղությամբ:
Նշենք, որ 2022–2023 թթ. ուսումնական տարում ՀՀ 33 հանրակրթական հաստատություններում կազմակերպվել է տարածաշրջանային լեզուների ուսուցում։ Հաստատություններից 13–ում ուսուցանում են պարսկերեն, 3–ում՝ վրացերեն, 12–ում՝ Թուրքերեն, 4–ում՝ ադրբեջաներեն։