ԵՐԵՎԱՆ, 13 ապրիլի — Sputnik. Իտալիայի ըմբշամարտի ֆեդերացիայի հայտարարած բողոքից հետո Ըմբշամարտի միջազգային ֆեդերացիան (UWW) կրկնակի կստուգի վերջերս Բաքվում կայացած մրցաշարի մենամարտը, հաղորդում է La Repubblica թերթը։
Մրցաշարում, որտեղ եզրափակիչ անցածները ստացել են Փարիզի օլիմպիադայի ուղեգրեր, ազատ ոճի ըմբիշ Ֆրանկ Չամիզոն, որը ներկայացնում է Իտալիան 74 կգ քաշային կարգում, կիսաեզրափակիչում հանդիպել է ադրբեջանցի ըմբիշ Թուրան Բայրամովի հետ։
Մենամարտի ավարտին 5 մրցավարներ իտալացու օգտին են հանդես եկել, բայց մրցավարական կոլեգիայի նախագահը չեղարկել է նրանց որոշումը՝ հաղթանակը շնորհելով ադրբեջանցուն։
«Ըմբշամարտի համաշխարհային ֆեդերացիան արդեն հաշվետվություն է ստացել մրցավարական կորպուսից և մրցավարներից, որոնք պատվիրակվել են մրցաշարին։ Մրցաշարի մենամարտերի բոլոր դրվագները, մրցավարական որոշումները և մարզիչների բողոքները (այսպես կոչված չելենջները,– խմբ․) ուշադիր և անաչառ կուսումնասիրվեն»,- ասվում է UWW հայտարարությունում։
Հանդիպումից հետո ֆեդերացիան կուսումնասիրի նաև Չամիզոյի հայտարարությունն այն մասին, որ մրցաշարում իրեն 300 հազար դոլար են առաջարկել պարտության համար։