ԵՐԵՎԱՆ, 13 ապրիլի– Sputnik. Տարածաշրջանում նոր երթուղիները կնպաստեն Հայաստանի և Ղազախստանի երկկողմ առևտրատնտեսական կապերի ամրապնդմանը։ Այս մասին ասել է Ղազախստանի Հանրապետության նախագահ Կասիմ-Ժոմարտ Տոկաևը «Արմենպրեսին» տված հարցազրույցում։
Չնայած վերջին հինգ տարիների ընթացքում փոխադարձ առևտուրն աճել է 3,5 անգամ, իսկ 2023 թվականին ապրանքաշրջանառությունն աճել է 23 տոկոսով, բայց, Տոկաևի կարծիքով, առևտրի ծավալները չեն համապատասխանում երկու երկրների ներուժին։
«Դրա համար կան օբյեկտիվ պատճառներ՝ կապված երկրների միջև բարդ տրանսպորտային լոգիստիկայի հետ։ Այնուամենայնիվ, արտահանման-ներմուծման հնարավորությունները վկայում են փոխադարձ առևտրի զգալի ընդլայնման լուրջ ներուժի առկայության մասին»,– ասել է նա։
Ղազախստանի նախագահը շեշտել է, որ զգալիորեն աճել է Հարավային Կովկասի նշանակությունը Եվրասիայի տրանսպորտային համակարգում։ Այս համատեքստում, ըստ Տոկաևի, ուշադրության է արժանի նաև «Խաղաղության խաչմերուկ» նախագիծը՝ որպես տրանսպորտային նոր գաղափար, ինչպես նաև տարածաշրջանային լոգիստիկ կառուցվածքին միացնելու տեսանկյունից։
Նա հիշեցրել է, որ մինչև 2011 թվականը ցորենը դեպի Հայաստան ղազախական արտահանման առաջատար ապրանքներից էր, ու կարևոր է համարել ցորենի և այլ պարենային ապրանքների մատակարարումների վերականգնումը Հայաստանի խոշոր առևտրային ցանցերին։
«Այսօր մեր երկիրը պատրաստ է ավելացնել 70 անուն ապրանքի արտահանումը՝ թե՛ հումք, թե՛ պատրաստի արտադրանք՝ 350 միլիոն դոլար ընդհանուր արժեքով»,– ասել է նա։
Կասիմ-Ժոմարտ Տոկաևը կարծում է, որ հայ– ղազախական գործարար համագործակցությանն ու զբոսաշրջության զարգացմանը նպաստում է նաև 2023 թվականին «Ակտաու-Երևան-Ակտաու» ուղիղ չվերթերի բացումը։ Նա հույս է հայտնել, որ շուտով ուղիղ չվերթեր կլինեն նաև երկու մայրաքաղաքների միջև։
Հիշեցնենք, որ Ղազախստանի նախագահ Կասիմ–ժոմարտ Տոկաևը ապրիլի 15-ին մեկօրյա պաշտոնական այցով կժամանի Հայաստան: Նախատեսված են հանդիպումներ ՀՀ վարչապետ Նիկոլ Փաշինյանի և նախագահ Վահագն Խաչատուրյանի հետ: