ԵՐԵՎԱՆ, 11 ապրիլի – Sputnik. «ՌԻԴ» ՍՊԸ–ն հրաժարվել է Երևանի մանկական երկաթուղու վերակառուցման ծրագրից։ Ընկերությունը հայտարարություն է տարածել` նշելով, որ 5 տարվա ընթացքում այդպես էլ չի կարողացել ՀՀ իշխանություններից ստանալ անհրաժեշտ հավանությունը՝ չնայած ներկայացված բազմաթիվ նախագծերին:
«ՌԻԴ»–ը 5 տարի առաջ ձեռք է բերել կառավարող ընկերության բաժնետոմսերի 60%-ը, սակայն հիմա որոշել է վերադարձնել դրանք։
«Ստեղծված իրավիճակում, երբ նույնիսկ նման կարևոր նախագծերը, ինչպիսին այս մեկն է, տարիներ շարունակ չեն համաձայնեցվում տեղական իշխանությունների կողմից, մենք ստիպված ենք խոստովանել, որ մեր մեծ նախագծին վիճակված չէ իրականանալ։ Այսօր մենք տխուր ենք` տեսնելով, թե ինչպես է ավերակների վերածվում այն այգին, որը ժամանակին երեխաների ուրախության և զվարճանքի վայր էր»,-նշվում է հայտարարության մեջ։
Նշենք, որ «ՌԻԴ» ընկերությունը պատկանում է ռուսաստանաբնակ գործարար Ռուբեն Գրիգորյանին: