Գրեթե 17 տարի առաջ բանակում պատահարի հետևանքով ձեռքերը կորցրած, հետագայում գեղանկարիչ դարձած Գարիկ Միքայելյանն ու նրա կինը` արվեստաբան Արմինե Մելիք–Իսրայելյանը, հավատում են, որ Հայաստանը կարող է դուրս գալ երկրի համար բարդ իրավիճակից։ Հենց այդ հավատն է օգնել, որ նրանք գեղանկարների շարք ստեղծեն, որոնք ցուցադրվում են Հայաստանի բնության թանգարանում։
Ցուցահանդեսի կազմակերպման հրավերը զույգը ստացել է հենց թանգարանի ղեկավարությունից։ Արմինեն ու Գարիկը ալպիական մանուշակների հետ նաև զկեռներ են նկարել, ու երբ թանգարանի ղեկավարները տեսել են՝ հարցուփորձ են արել, թե երբ են թանգարանում ցուցահանդես կազմակերպելու։ Զկեռները դարձել են ցուցահանդեսի կազմակերպման առիթ։
«Գարիկն անմիջապես համաձայնեց, իսկ Արմինեն սկսեց վազվզել»,–ծիծաղելով պատմում է Արմինեն ու բացատրում, որ Գարիկի 4-րդ, իր 2-րդ անհատական ցուցահանդեսը կազմակերպելը մեղմ ասած հեշտ գործ չէր։
Զույգի ստեղծագործությունները մարտի 16–ից մինչև ապրիլի 10–ը ներկայացվում են «Վերածնունդ Art Provence» խորագրով։
Ցուցասրահի պատերին կախված են ինչպես Գարիկի, այնպես էլ Արմինեի նկարները, որոնց մուսան զույգի առանձնատան այգու` «ԳԱրմին ԳԱրդեն»–ում աճող բույսերն ու ծաղիկներն են։ Գարիկը վստահ է, որ եթե նկարիչը սիրում է բնությունը, տեսնում է բնության ամեն մասնիկը, կարող է կենդանի նկարներ ստեղծել։
«Սա իմ նկարներից տարբերվում է նրանով, որ նույն նկարի ձախ կողմը նկարել եմ ոտքով, աջը` ձեռքի պրոթեզով։ Ձախն ավելի ամուր, կոշտ ստացվեց, իսկ աջը` ավելի նուրբ»,–ասում է Գարիկն ու ցույց տալիս երկու ծաղկամանների գեղանկարը։
Իսկ թե ինչու են ցուցահանդեսն անվանել «Վերածնունդ», զույգն իր բացատրությունն ունի։ Ասում են՝ այժմ Հայաստանին վերածնունդ, պայքարի ուժ է պետք։
«Խորագրի իմաստը ոչ միայն գարնանային զարթոնքն է, այս պատկերներն են, ծաղիկները, այլ նաև վերածնունդի գաղափարն է դրված հիմքում և մարդու պայքարի ուժը, թե ինչի կարող է հասցնել մարդուն չհանձնվելու նպատակը, որը հաստատ թունելի վերջում լույս վառող է»,–ասում է Արմինեն։
Զույգը շարունակում է հավատալ այդ լույսին. Չէ՞ որ 2016-ին Գարիկի աշխատանքների առաջին` «Ճանապարհ դեպի լույս» խորագրով անհատական ցուցադրությունը ճակատագրական դարձավ։ Գարիկի կյանքում հայտնվեցին Արմինեն ու նրա բերած լույսը։