ԵՐԵՎԱՆ, 9 ապրիլի – Sputnik. ՀՀ–ում ձեռնարկություններ ունեցող պաշտոնյաները պետք է դրանք հավատարմագրային կառավարման հանձնեն միայն պրոֆիլային խորհրդատվական ընկերություններին։
«Հանրային ծառայության մասին» ՀՀ օրենքում համապատասխան փոփոխությունների նախագիծն ԱԺ–ում ներկայացրեց ՀՀ արդարադատության փոխնախարար Կարեն Կարապետյանը:
Նա հիշեցրեց, որ պետական ծառայության անցնելով՝ բիզնես ունեցող պաշտոնյաները պետք է հավատարմագրային կառավարման հանձնեն այն։
ՀՀ–ում տնտեսվարողի հարազատները կամ ընկերները գրանցվում են որպես անհատ ձեռնարկատեր և դառնում ձևական կառավարիչներ։ Այդ սողանցքը փակելու համար ՀՀ կառավարությունը որոշել է, որ տվյալ ձեռնարկությունների կառավարիչ կարող են դառնալ միայն ֆինանսական կազմակերպությունները, որոնք ունեն պետական գրանցում։
Պատասխանելով «Հայաստան» դաշինքի պատգամավոր Արթուր Խաչատրյանի հարցին՝ Կարապետյանը հստակեցրեց, որ մինչև օրենքի վերջնական ընդունումը կկարգավորվի այն հարցը, թե հնարավոր են արդյոք ավելի մեղմ պայմաններ երբեմնի բաց, բայց վաղուց չգործող ձեռնարկությունները կառավարման հանձնելու համար: