Երևանի քաղաքապետարանի աշխատակիցները Փակ շուկային հարող տարածքից հավաքել են դրսում առևտուր անողների ապրանքները։
Առևտրականներ Կարինեն և Անահիտը Sputnik Արմենիային պատմեցին, որ իրենց ապրանքի կեսը տարել են, մյուս կեսն էլ պահեստում է եղել, չեն կարողացել տանել։
Նրանք պատմեցին, որ գրավոր դիմել են քաղաքապետարան, որպեսզի անցումի տակ սեղաններ դնեն, իրենք էլ վճարեն, կանգնեն, բացասական պատասխան են ստացել։
Հարցին, թե ինչ պիտի անեն, եթե մնացած ապրանքն էլ տանեն, կանանցից մեկը ուսերը թոթվեց։
«Եթե սա էլ գան, տանեն, գրություն եմ գրելու, ինձ կամրջից գցեմ, բա ի՞նչ անեմ, սովամահ լինե՞մ»,– ասաց նա։
Հիշեցնենք` 2023 թվականի ապրիլից խստացվել է փողոցային առևտրի համար նախատեսված պատիժը. բացի 70-100 հազար դրամ տուգանքից, սահմանվել է նաև ապրանքի բռնագրավում։ Մեկ տարվա ընթացքում կրկնակի խախտման դեպքում տուգանքը կազմում է 200 հազար դրամ՝ անվերապահ բռնագրավմամբ: