ԵՐԵՎԱՆ, 2 ապրիլի – Sputnik. Ռուսաստանաբնակ հայազգի դերասանուհի և հեռուստահաղորդավարուհի Սաթի Սպիվակովան դարձել է «Ժպիտների քաղաք» բարեգործական հիմնադրամի բարի կամքի դեսպան։ Այս մասին նա ասաց Sputnik Արմենիայի մուլտիմեդիոն կենտրոնում տեղի ունեցած մամուլի ասուլիսի ժամանակ։
Երևանում կայանալիք ներկայացումների վաճառքից ստացված հասույթը նա կփոխանցի հենց այս հիմնադրամին։
Ռուսաստանաբնակ հայազգի դերասանուհի և հեռուստահաղորդավարուհի Սաթի Սպիվակովան Sputnik Արմենիայում
© Sputnik / Asatur Yesayants
Սպիվակովան Հայաստանում է մոսկովյան «Ազգերի թատրոնի» հյուրախաղերի շրջանակներում: Մայրության և գեղեցկության տոնին ընդառաջ Երևանում թատրոնը կներկայացնի Մարիա Վարդենգի պիեսի հիման վրա բեմադրված «Դեղձանիկը» ներկայացումը: Օպերային դիվա Մարիա Կալասի դերը կկատարի Սաթի Սպիվակովան։
Դերասանուհին ասում է, որ չէր կարող Երևան գալ պարզապես ներկայացումով և չմասնակցել ինչ–որ միջոցառման: Նա որոշել է դառնալ «Ժպիտների քաղաքի» բարի կամքի դեսպան, քանի որ 2023 թվականին անձամբ է անցել այդ դժվարության միջով։
«Բարեբախտաբար, պահապան հրեշտակներն ինձ հետ էին։ Իմ բախտը բերեց բժիշկների հարցում, ու նաև օգնեց այն փաստը, որ ինձ մոտ ուռուցքն հայտնաբերվեց վաղ փուլում։ Հիմա ես նույնիսկ չեմ կարող պատկերացնել, թե ինչ են ապրում այն երեխաների ծնողները, որոնք ունեն նման ախտորոշում»,– ասում է նա։
Հիշեցնենք, որ ապրիլի 3-ին Սպիվակովան կայցելի Երևանի պրոֆեսոր Ռ. Յոլյանի անվան Արյունաբանական կենտրոնի մանկական ուռուցքաբանության և արյունաբանության բաժանմունք: Նա կհանդիպի կենտրոնի ղեկավարության, փոքրիկ բուժառուների և նրանց ծնողների հետ։ Երեխաներին անակնկալներ են սպասում:
Ապրիլի 7-ին «Գաֆէսճեան» ժամանակակից արվեստի կենտրոնում տեղի կունենա Սպիվակովայի հանդիպումը Հայաստանի արվեստագետների հետ: