ԵՐԵՎԱՆ, 29 մարտի – Sputnik. Ոստիկանության Նոր Նորքի բաժնում կատարված առերևույթ ահաբեկչության վերաբերյալ քրեական վարույթի շրջանակներում միաժամանակյա խուզարկություններ են իրականացվում շուրջ 4 տասնյակ հասցեներում, իրականացվում են նաև այլ քննչական գործողություններ։ Տեղեկությունը Sputnik Արմենիայի հետ զրույցում ասաց ՀՀ քննչական կոմիտեի մամուլի խոսնակ Գոռ Աբրահամյանը։
«Այս պահի դրությամբ հավելյալ ինֆորմացիա չի տրամադրվում»,–ասաց նա։
Նշենք, որ ԶԼՄ–ներում տեղեկություններ են հայտնվել, որ ահաբեկչության գործով խուզարկություններ են իրականացվում ԱԺԲ-ի հետ փոխկապակցված 40-ից ավելի հասցեներում։ ԱԺԲ խոսնակ Հերմինե Մկրտչյանն էլ տեղեկացրել է, որ խուզարկություն են իրականացնում Ժիրայր Սեֆիլյանի, Կարո Եղնուկյանի, Աշոտ Պետրոսյանի, Վահագն Ավագյանի, Վահե Գասպարյանի բնակարաններում։
Հիշեցնենք` 3 տղամարդիկ մարտի 24-ին փորձել էին ներխուժել ոստիկանության Նոր Նորքի բաժին։ Նրանք նռնակ էին գործադրել, ինչի հետևանքով ներխուժողներից 2–ը վնասվածքներ էին ստացել ու տեղափոխվել բուժհաստատություն։ Ըստ ՆԳՆ–ի` նռնակ պայթեցրած անձը 55-ամյա Ա․ Մ-ն է, իսկ պայթյունի հետևանքով վնասվածքներ են ստացել 55-ամյա Ա․ Մ․-ն և 51-ամյա Վ․ Գ․-ն, որոնք տեղափոխվել են բժշկական կենտրոն։ ԱԱԾ ծառայողների կողմից վնասազերծված տղամարդը ձերբակալվել է։
Ավելի ուշ ՀՀ ՆԳՆ խոսնակը հայտարարեց, որ ՀՀ ներքին գործերի նախարարության նախնական տվյալներով` Նոր Նորքի ոստիկանության բաժնի վրա հարձակվողները «Ազգային ժողովրդավարական բևեռ»–ի անդամներ են։