ԵՐԵՎԱՆ, 27 մարտի – Sputnik. «Դեմոկրատական այլընտրանք» կուսակցությունը պատրաստվում է փողոցային պայքար նախաձեռնել Հայաստանի գործող իշխանության դեմ՝ նպատակ ունենալով հասնել արտահերթ խորհրդարանական ընտրությունների։ Այս մասին Sputnik Արմենիա մուլտիմեդիոն կենտրոնում ասուլիսի ժամանակ ասաց «Դեմոկրատական այլընտրանք» կուսակցության նախագահ Սուրեն Սուրենյանցը։
Նա կարծում է, որ ներկայիս «տիտղոսային» ընդդիմությունը չի առաջարկում իրական և այլընտրանքային բովանդակություն։ Նրանց հիմնական վրիպումն այն էր, որ նրանք անկարող եղան սեփական օրակարգ և Հայաստանի սեփական տեսլականը ներկայացնել։ Քաղաքագետը վստահ է՝ այդ օրակարգի բացակայությունը ձեռնտու է գործող վարչապետին, և վերջինս մինչ օրս կարողանում է իշխանությունը պահել «նախկիններ-ներկաներ» գրագետ կառուցված մարտավարությամբ։ Այլ կերպ ասած` քաղաքական գործիչը ելք է առաջարկում այս քաղաքական ճգնաժամում։
«Մենք ունենք ճանապարհային քարտեզ, մենք պարտաստվում ենք ցանցային պայքարի տարբերակով առաջնորդվել։ Փոքր հավաքներ կանցկացնենք ու մարզերում էլ նույն կերպ կլինի, կփորձենք գիտակից քաղաքացիների այնպիսի խումբ հավաքել, որը կլեգիտիմացնի ԱԺ արտահերթ ընտրությունների մեր պահանջը»,- ասաց Սուրենյանցը։
Հարցին, թե ովքեր նրանց հետ կլինեն հարթակում, քաղաքագետը շեշտեց՝ կազմակերպիչը հենց «Դեմոկրատական այլընտրանք» կուսակցությունն է, բայց իրենք հրավերներ են ուղարկել նաև այլ գործիչների։
Սուրենյանցը նաև վստահ է՝ պետք է լինի փողոցային պայքար, ինչից հետո էլ կհասնեն խորհրդարանական ընտրությունների, իսկ այդ ընտրություններին Նիկոլ Փաշինյանը չպետք է մասնակցի։
Ապրիլի 6-ից սկսած նրա գլխավորած քաղաքական ուժը կսկսի հավաքներ։ Առաջին նմանատիպ հավաքը կիրականացվի Շառլ Ազնավուրի հրապարակում։