ԵՐԵՎԱՆ, 26 մարտի – Sputnik. Մոսկվայի Բասմանի դատարանը կալանավորել է «Կրոկուսի» ահաբեկչության գործով 8-րդ մեղադրյալ Ալիշեր Կասիմովին։ Տեղեկությունըհայտնում է ՌԻԱ Նովոստին։
«Քննության միջնորդությունը բավարարել, Ալիշեր Կասիմովի նկատմամբ որպես խափանման միջոց ընտրել կալանքը մինչև մայիսի 22-ը», - որոշումը հրապարակել է դատավոր Ելենա Լենսկայան:
Կասիմովը Ռուսաստանի քաղաքացի է, ծնունդով Ղրղզստանից։ Նա, լինելով անհատ ձեռնարկատեր, սրճարան ուներ, որտեղ էլ աշխատում էր։ Ապրում է Կրասնոգորսկի մերձակայքում՝ Պուտիլկովո գյուղում: Սա գործի առաջին ֆիգուրանտն է, որի նիստին եկել են հարազատները՝ մայրը, եղբայրը և հորեղբայրը։
Հարցին, թե արդյոք իրեն հասկանալի է մեղադրանքը, Կասիմովը պատասխանել է, որ պարզապես բնակարան է հանձնել «Ավիտոյի» միջոցով ու չի իմացել, որ պատսպարել է ապագա ահաբեկիչներին: Նիստը շարունակվել է դռնփակ։
Մոսկվայի Բասմանի դատարանը մարտի 24-ի լույս 25-ի գիշերը 2 ամսով կալանավորել է ահաբեկչության կատարողներ Դալերջոն Միրզոևին, Սաիդակրամի Ռաչաբալիզոդային, Շամսիդին Ֆարիդունիին և Մուհամադսոբիր Ֆայզովին: Նրանց բոլորին մեղադրանք է առաջադրվել կազմակերպված խմբի կազմում մահվան պատճառ դարձած ահաբեկչություն կատարելու համար (ՌԴ ՔՕ 205-րդ հոդվածի 3-րդ մասի «Բ» կետ):
Մարտի 25-ին նույն դատարանը կալանավորեց հայր և երկու որդի Իսրայել, Դիլովար և Ամինչոն Իսլոմովներին:
Հիշեցնենք` մարտի 22-ին Մոսկվայի շրջանի «Կրոկուս Սիթի Հոլ»–ում համերգից առաջ հրաձգություն է եղել, այնուհետև հրդեհ է բռնկվել: Վերջին տվյալներով` ահաբեկչության հետևանքով տուժել է 285 մարդ (այդ թվում՝ 8 երեխա), որոնցից 139-ը մահացել են (այդ թվում՝ 3 երեխա)։ Բուժհաստատություններ են տեղափոխվել և հոսպիտալացվել 114 մարդ, որից 4-ը՝ երեխա։
Ռուսաստանի քննչական կոմիտեն ահաբեկչության մասին քրեական գործ է հարուցել։ Ձերբակալվել է 11 մարդ, այդ թվում` 4 ահաբեկիչները` Դալերջոն Միրզոևը, Ռաչաբալիզոդա Սաիդակրամին, Մուհամմադսոբիր Ֆայզովը և Ֆարիդունի Շամսիդինը։ Նրանց ցմահ ազատազրկում է սպառնում։