ԵՐԵՎԱՆ, 26 մարտի – Sputnik. ՀՀ քրեակատարողական հիմնարկներ մատակարարվող սնունդը հիմա բավական նորմալ որակի է։ ՀՀ ԱԺ պետաիրավական հարցերի մշտական հանձնաժողովի այսօրվա նիստի ժամանակ այս հայտարարությունն արեց ՀՀ արդարադատության նախարար Գրիգոր Մինասյանը։
«Անձամբ ինքս էլ եմ ստուգում, փորձում, բավականին լավ որակի է, սակայն ունենք ռազմավարական նպատակ՝ հասնելու ԵՄ ստանդարտներին, այն է՝ հասնելու հանձնուքների ինստիտուտի վերացմանը, քանի որ այն ինքնին կոռուպցիայի ինստիտուտ է, որի միջոցով ՔԿՀ են ներթափանցում բոլոր տեսակի արգելված իրերը, նյութերը»,- ասաց նախարարը։
Ըստ նրա՝ հանձնուքների արգելումը կարող էին արդեն սկսել մյուս ամսվանից, բայց հասկացել են, որ դա բավականին ցավոտ ռեֆորմ կլիներ։
«ՔԿՀ-ներում նստած մարդիկ սովորել են, որ ընտանիքի անդամներին նեղություն տալով՝ կարող են ավելի ճոխ ուտեստներ պատվիրել։ Ուսումնասիրությունները ցույց են տվել, որ հանձնուքների միջոցով ՔԿՀ են գալիս ոչ թե անհրաժեշտ իրեր ու սնունդ, այլ շատ ճոխ սնունդ։ Արդյունքում մենք հասկացել ենք, որ ՔԿՀ-ներում եղած սննդակարգը պետք չէ շատ փոփոխել, այլ պետք է ընդամենը մի քիչ լավացնել, բարեփոխել։ Ուղղակի մարդիկ այնտեղ երկար ժամանակ նեղ պայմաններում գտնվելով` համային հաճույքների վրա ավելի շատ ուշադրություն են դարձնում՝ պատվիրելով ճոխություններ, որոնք այնքան էլ անհրաժեշտ չեն»,- ընդգծեց Մինասյանը։
Նախարարը նաև նշեց, որ պայքարում են ՔԿՀ–ների «արտոնյալների» դեմ։
«Եղել է դեպք, որ մտել ենք ՔԿՀ, պարզվել է` այնտեղ բազկաթոռներ կան որոշ խցերում, ու այստեղ սկսում ենք շատ հաճախ կոպիտ միջամտություններ անել։ Հարց է առաջանում, թե դրանք ինչպես են այնտեղ հայտնվել, սա արդեն այլ հարց է․ սկսում են անցկացվել ծառայողական քննություններ, ուսումնասիրություններ և այլն»,- վստահեցրեց նա։
Մինասյանն անդրադարձավ նաև ՔԿՀ ներթափանցող բջջային հեռախոսներին։ Նրա խոսքով՝ դրանց դեմ հնարավոր է պայքարել խլացուցիչների տեղադրմամբ։ Այդ պատճառով չինական մի ընկերությունից պատվիրել են խլացուցիչներ, սակայն տվյալ ընկերության պատվերներն այնքան շատ են տարբեր երկրներից, որ մեր երկիրը ստիպված է սպասել իր հերթին, որպեսզի կարողանա դրանք ձեռք բերել։
Ինչ վերաբերում է խմելու ջրի որակին, ապա նախարարը վստահեցրեց, որ երեք տարբեր ՔԿՀ-ներից փորձանմուշներ են վերցրել ու ստացել են լավ պատասխաններ, որ ջուրը նորմալ որակի է։