ԵՐԵՎԱՆ, 26 մարտի – Sputnik. Մոսկվայի «Կրոկուս Սիթի Հոլ»–ում ահաբեկչությունը նախապատրաստել են իսլամիստ արմատականները, որոնց օգնել են նաև ուկրաինական հատուկ ծառայությունները։ Այս մասին հայտարարել է ԱԴԾ տնօրեն Ալեքսանդր Բորտնիկովը լրագրող Պավել Զարուբինի հետ հարցազրույցում։
Նրա խոսքով՝ ռուսական հետախուզական ծառայություններին հայտնի է, որ Ուկրաինան զինյալներ է պատրաստել Մերձավոր Արևելքում։
Բորտնիկովը հայտնել է, որ ահաբեկչության մեջ ներգրավված անձանց շրջանակն ընդլայնվելու է, իսկ հանցակիցների թիվը` ավելանալու։ Նշենք, որ այս պահին կալանավորված ու ձերբակալված 11 անձ կա։
Նա համոզված է, որ ահաբեկչությունն արևմտյան հետախուզական ծառայություններին և Ուկրաինային անհրաժեշտ էր իրավիճակը բորբոքելու և ռուսական հասարակության մեջ խուճապ ստեղծելու համար։
Բորտնիկովը նաև նշել է, որ ահաբեկիչները պատրաստվում էին փախչել Ուկրաինա, իսկ այնտեղ նրանց դիմավորելու էին որպես հերոսների։ Սակայն ռուսական հատուկ ծառայություններն ամեն ինչ արեցին, որպեսզի դա տեղի չունենա։ ԱԴԾ ղեկավարը կարծում է, որ Ուկրաինայի անվտանգության ծառայությունը պետք է ճանաչվի որպես ահաբեկչական կազմակերպություն։
Ինչ վերաբերում է ահաբեկչության սպառնալիքի մասին ամերիկացիների նախկինում հնչեցրած նախազգուշացմանը, ապա, ըստ պաշտոնյայի, ահաբեկչության նախապատրաստման մասին ԱՄՆ-ի փոխանցած տեղեկատվությունը ընդհանուր բնույթ է կրել, որին պատասխանել են ռուսական հետախուզական ծառայությունները։
Հիշեցնենք` մարտի 22-ին Մոսկվայի շրջանի «Կրոկուս Սիթի Հոլ»–ում համերգից առաջ հրաձգություն է եղել, այնուհետև հրդեհ է բռնկվել: Վերջին տվյալներով` ահաբեկչության հետևանքով 139 մարդ է մահացել (այդ թվում՝ 3 երեխա)։
Ռուսաստանի քննչական կոմիտեն ահաբեկչության մասին քրեական գործ է հարուցել։ Ձերբակալվել է 11 մարդ, այդ թվում` 4 ահաբեկիչները` Դալերջոն Միրզոևը, Ռաչաբալիզոդա Սաիդակրամին, Մուհամադսոբիր Ֆայզովը և Ֆարիդունի Շամսիդինը։ Նրանց ցմահ ազատազրկում է սպառնում։ Նրանք, ինչպես նաև ահաբեկչությանն օժանդակելու մեջ մեղադրվող Իսրայել, Դիլովար և Ամինչոն Իսլոմովները կալանավորվել են մինչև մայիսի 22-ը։