Հայ և ռուս ժողովուրդները միմյանց կողքին են. Երևանում ՌԴ դեսպանատանը սգո մատյան է բացվել

Հայաստանում Ռուսաստանի դեսպանատանը սգո մատյան է բացվել մարտի 22-ին «Կրոկուս Սիթի Հոլ»-ում տեղի ունեցած ահաբեկչությունից զոհվածների հրազատներին իրենց ցավակցությունը հայտնել ցանկացողների համար։

ՌԴ դեսպանատուն եկած քաղաքացիների շարքում կան ինչպես դեսպաններ, հասարակական գործիչներ, ակտիվիստներ, նախկին ու ներկա պաշտոնյաներ, դիվանագետներ, այնպես էլ հասարակ մարդիկ, որոնք վշտակցում են ռուս ժողովրդին։

Ինչպես լրագրողների հետ զրույցում ասաց «Քաղաքացիական պայմանագիր» կուսակցությունից ԱԺ պատգամավոր Ալեքսեյ Սանդիկովը, նախօրեին Մոսկվայում տեղի ունեցած իրադարձությունները բոլորին շոկի են ենթարկել։

Նրա խոսքով՝ ոչ ոք չի կարող անտարբեր լինել կատարվածի նկատմամբ։

Ուզում եմ, որ բոլորն իմանան, որ ցանկացած դժվարին պահին մեր ժողովուրդները պետք է իրար կողքի լինեն, և դա միշտ այդպես է»,- ասաց պատգամավորը։

Հայաստանի Հանրապետական կուսակցության փոխնախագահ Էդուարդ Շարմազանովն էլ իր հերթին նշեց, որ տեղի ունեցածը սարսափելի ողբերգություն է։

Հիշեցնենք` մարտի 22-ին հայտնի դարձավ, որ մերձմոսկովյան Կրասնոգորսկում գտնվող «Կրոկուս Սիթի Հոլ»–ում համերգից առաջ հրաձգություն է եղել, այնուհետև հրդեհ է բռնկվել: Վերջին տվյալներով` ահաբեկչության հետևանքով տուժել է 285 մարդ (այդ թվում՝ 8 երեխա), որոնցից 133-ը մահացել են (այդ թվում ՝ 3 երեխա)։ Բուժհաստատություններ են տեղափոխվել և հոսպիտալացվել 114 մարդ, որից 4-ը՝ երեխա։

Ռուսաստանի քննչական կոմիտեն ահաբեկչության մասին քրեական գործ է հարուցել։ Ձերբակալվել է 11 մարդ, այդ թվում` 4 ահաբեկիչները։

Մարտի 24-ը ՌԴ-ում հայտարարվել է համազգային սգո օր։