Ջրային պարեկներն առավել մեծ անձնակազմով կապահովեն հասարակական կարգն ու քաղաքացիների անվտանգությունը։ Տեղեկությունը հայտնում է ՆԳՆ մամուլի ծառայությունը։
«ՆԳՆ կրթահամալիրում մեկնարկել են Ջրային պարեկային ծառայության երկրորդ հոսքի վերապատրաստման դասընթացները, որոնց ներգրավված են լողալու կարողությունների մակարդակի ստուգման մրցույթը հաղթահարած 36 պարեկներ»,–նշված է հաղորդագրության մեջ։
Վերապատրաստման ընթացքում պարեկներն ուսումնասիրում են Ջրային պարեկային ծառայության օրենսդրությունը, ծանոթանում լողամիջոցներին ու փրկարարական սարքավորումներին։ Տեսական գիտելիքները նրանք կիրառում են նախ կրթահամալիրում գտնվող նավի վրա, իսկ ավարտական փուլում՝ Սևանա լճում անցկացվող գործնական պարապմունքների ժամանակ։
Վերապատրաստման ավարտին պարեկներն անցնելու են համալիր ստուգումներ, որոնք հաղթահարածները կմիանան դեկտեմբերից Սևանա լճում ծառայող գործընկերներին: