ԵՐԵՎԱՆ, 22 մարտի – Sputnik․ Հայաստանի հանրային ռադիոյի տնօրեն Գարեգին Խումարյանի «Ցլերի, հռչակագրի, մեր ինքնության մասին» հոդվածում լրագրողների էթիկական սկզբունքների կանոնագրի դրույթների խախտում չկա։ Այս մասին ասվում է Հայաստանի ԶԼՄ-ների էթիկայի Դիտորդ մարմնի հրապարակած փորձագիտական կարծիքում։
«Գարեգին Խումարյանի հոդվածում արտահայտված են հեղինակի կարծիքն ու գնահատողական դատողությունները։ Մեկնաբանություններն ու վերլուծությունները հիմնված են ստույգ փաստերի և տեղեկությունների վրա։ Հանրային ռադիոյի եթերում հեռարձակվել է ՀՀ վարչապետի հարցազրույցը, իսկ օրեր անց այդ հարցազրույցի՝ հանրային հնչեղություն ունեցող և հանրային բանավեճ հարուցած արտահայտությունների և պնդումների վերաբերյալ գործադիր տնօրենի հոդվածը, ինչը համապատասխանում է բազմակարծության օրենսդրական պահանջին և էթիկայի կանոնագրով սահմանված՝ կարծիքների փոխանակման ազատությանը»,- նշված է Հայաստանի ԶԼՄ-ների Էթիկայի Դիտորդ մարմնի փորձագիտական կարծիքում։
Հիշեցնենք՝ վարչապետ Նիկոլ Փաշինյանի՝ Հանրային ռադիոյին տված հարցազրույցից հետո Գարեգին Խումարյանը հոդված էր հրապարակել՝ գնահատական տալով հաղորդավարի աշխատանքին։ Խումարյանը նաև իր անհամաձայնությունն էր հայտնել հաղորդման ընթացքում Հայաստանի անվտանգության վերաբերյալ Փաշինյանի հայտնած դիրքորոշմանը։
Հոդվածի հրապարակումից հետո Հանրային հեռարձակողի խորհուրդը հանդես եկավ հայտարարությամբ, թե առաջիկայում քննության կառնի Գարեգին Խումարյանի գործողությունների համապատասխանելիությունը էթիկական և իրավական նորմերին։ Խորհրդի կարծիքով՝ ռադիոընկերության տնօրենը առերևույթ չարաշահել է իր լիազորություններն ու պաշտոնեական դիրքը` օգտագործելով Հանրային ռադիոյի հեղինակությունը և պաշտոնական կայքը՝ սեփական կարծիքը անվիճարկելիորեն ներկայացնելու և առավելագույն արձագանք ապահովելու համար։
Ավելի ուշ Խորհուրդը դիմել էր Հայաստանի ԶԼՄ-ների էթիկայի Դիտորդ մարմնին՝ Խումարյանի գործողությունների վերաբերյալ փորձագիտական կարծիք ստանալու ակնկալիքով։