ԵՐԵՎԱՆ, 20 մարտի – Sputnik. Սուրբ Զատկի տոնին ընդառաջ ՀՀ սննդամթերքի անվտանգության տեսչական մարմինը վերահսկողական միջոցառումներ կանցկացնի ձվի արտադրությամբ զբաղվող կազմակերպություններում։ Տեղեկությունը հայտնում է ՀՀ սննդամթերքի անվտանգության տեսչական մարմինը։
Նշվում է, որ այսօրվանից մեկնարկած վերահսկողական միջոցառումները կանցկացվեն ոչ միայն ձվի արտադրությամբ զբաղվող կազմակերպություններում, այլև իրացման շուկայում՝ առկա ռիսկերը գնահատելու և ոչ պատշաճ որակի ձվի մատակարարումը բացառելու նպատակով:
Սննդամթերքի անվտանգության տեսչական մարմնից կոչ են անում բոլոր սպառողներին իրացման ցանցում կասկածելի թարմությամբ ձու կամ այլ խախտումներ (մակնշման անհամապատասխանություն, սառնարանային ոչ պատշաճ պայմաններ, սանիտարահիգիենիկ խախտումներ և այլն) նկատելու դեպքում զանգահարել ՍԱՏՄ թեժ գծին՝ 118 անվճար հեռախոսահամարով, կամ գրել «Ֆեյսբուք» սոցիալական ցանցի էջին:
Հիշեցնենք, որ այս տարի Սուրբ Զատիկը` Հիսուս Քրիստոսի հրաշափառ Հարության տոնը, կնշվի մարտի 31-ին։