ԵՐԵՎԱՆ, 19 մարտի – Sputnik. «Ozon» ընկերության հետ կապված խնդիրը վերաբերել է ՀՀ ներմուծվող ապրանքների դեպքում անհրաժեշտ ուղեկցող փաստաթղթերի բացակայությանը։ Այս մասին հայտնում է ՀՀ պետական եկամուտների կոմիտեի տեղեկատվության և հասարակայնության հետ կապերի բաժինը` պատասխանելով Sputnik Արմենիայի հարցմանը։
Փետրվարի վերջին Հայաստանի ուղղությամբ ապրանքների մատակարարումների հետ կապված խնդիրներ էին առաջացել։ Եղել էր դեպք, երբ «Ozon»–ով պատվիրված ապրանքը չեղարկվել էր, բայց դրա դիմաց գումար էր դուրս գրվել։ Մարտի սկզբին «Ozon»–ից Sputnik Արմենիային հաստատել էին, որ մարկետփլեյսը դժվարությունների է հանդիպել, իսկ ավելի ուշ պարզաբանել էին, որ ընկերությունը մաքսային խնդիրների է բախվել ցամաքային տրանսպորտով որոշ ապրանքներ տեղափոխելիս։ ՊԵԿ–ն արձագանքել է այդ պարզաբանմանը։
«Փաստաթղթերի բացակայությունը տեղի է ունեցել կազմակերպության կողմից մատակարարման կազմակերպման ժամանակ աշխատանքներում թերացումների պատճառով։ Այնուամենայնիվ, մաքսային մարմինն իր իրավասությունների շրջանակում «Ozon» ընկերությանը առավելագույն աջակցություն է ցուցաբերել լրացուցիչ ֆինասական ծախսերից խուսափելու համար»,– ասված է ՊԵԿ–ի պատասխանում։
«Ozon Armenia»-ի կոմերցիոն տնօրեն Աշոտ Հախվերդյանը Sputnik Արմենիայի հետ զրույցում հաստատեց, որ ընկերությունը կապի մեջ է մաքսային մարմնի հետ։
«Մենք միասին լուծում ենք գտել, որը կարագացնի ապրանքների առաքումը ՀՀ՝ պահպանելով բոլոր կարգավորող նորմերը: Շնորհակալություն ՊԵԿ–ին համագործակցության և օպերատիվ աջակցության համար: Արդեն այս շաբաթ Հայաստանի գնորդները «Ozon»–ով պատվիրված ապրանքները կսկսեն ստանալ անվճար ավիառաքման միջոցով»,– ասաց նա։
Հիշեցնենք` Հայաստանում «Ozon»–ի միայն 1 տեսակավորման կենտրոն է գործում։ 2 հազար ք/կմ մակերեսով լոգիստիկ օբյեկտը գործարկվել է անցյալ տարի Երևանում։ Այն ապահովում է պատվերների ընդունումն ու մշակումը, դրանց կոմպլեկտավորումն ու փաթեթավորումը, ինչպես նաև վերադարձը։