ԵՐԵՎԱՆ, 14 մարտի – Sputnik. Միայն փետրվարին առևտրային բանկերի կողմից հաստատվել է Տավուշի մարզում տների կառուցման մոտ 250 վարկ։ ՀՀ կառավարության նիստի ժամանակ տեղեկությունը հայտնեց Տավուշի մարզպետ Հայկ Ղալումյանը։
«Կիրանց գյուղում՝ 13, Բերքաբերում՝ 16, Ոսկեվանում՝ 3, Բաղանիսում՝ 1, սա է ընդհանուր պատկերը։ Կան տներ, որտեղ արդեն ներքին հարդարման աշխատանքներն են ընթանում»,– ասաց նա։
ՀՀ վարչապետ Նիկոլ Փաշինյանին ուրախացրեց այդ փաստը։
«Պրոցեսը շատ լավ է։ Այդ թվերը ինչ–որ առումով ինդիկատոր են, թե ինչքանով են մարդիկ հավատում խաղաղության օրակարգին։ Սա կարևոր է, պետք է խթանել, որ հատկապես այդ հատվածներում մարդիկ ավելի ակտիվ լինեն»,– նշեց վարչապետը։
ՀՀ աշխատանքի և սոցիալական հարցերի փոխնախարար Դավիթ Խաչատրյանն իր հերթին ասաց, որ առաջիկա մեկ ամսում շուրջ 100 նոր պայմանագիր կավելանա Տավուշում։
«Սա, իրոք, շատ կարևոր է, պետք է այս ծրագիրը շարունակենք»,– ընդգծեց Փաշինյանը։
Նա համոզմունք հայտնեց, որ սա լավ տնտեսական էֆեկտ է բերելու մարզերում ու ընդհանրապես հանրապետությանը։