ԵՐԵՎԱՆ, 12 մարտի – Sputnik. Երևանի ավագանու «Մայր Հայաստան» խմբակցությունն այսօր բողոքի ակցիա իրականացրեց տրանսպորտի ուղեվարձի նոր նախագծի քննարկման ժամանակ։
Խմբակցության ղեկավար Մանուկ Սուքիասյանի ելույթի ժամանակ մյուս անդամները նույնպես մոտեցան ամբիոնին` «ոչ թանկացմանը», «100 դրամ» գրություններով պաստառներով։
«Երևանի փոքրամասնության իշխանությունը որոշել է լրացուցիչ ֆինանսական բեռ դնել երևանցիների վրա, քաղաքային տրանսպորտի գինը շեշտակի թանկացնում են՝ հասցնելով մինչև 300 դրամի։ Սա բացահայտ ցինիզմ է և ապաշնորհ կառավարում միաժամանակ»,– ասաց Սուքիասյանը իր ելույթի ժամանակ։
ՔՊ–ական ավագանու անդմաները ելույթի ընթացքում սկսեցին արձագանքել, ինչից հետո Տիգրան Ավինյանը ժեստերով հորդորեց նրանց լռել, հանգստանալ ու չշարունակել։
Խմբակցության անդամները հայտարարեցին, որ պայքարելու են թանկացումների դեմ ու ըստ այդմ՝ այսօրվա քվեարկությանը չեն մասնակցելու։