ԵՐԵՎԱՆ, 11 մարտի – Sputnik. Իրանցի գիտնականների խմբի ուսումնասիրությունները կարող են հակամարմինների ցածր մակարդակ (այսինքն՝ ցածր դիմադրողականություն) ունեցող հիվանդներին օգնել դեղորայքային բուժում ընդունել: Այս մասին Sputnik Արմենիային ասաց գիտնականների խմբի ղեկավար, Թեհրանի բժշկական գիտությունների համալսարանի կլինիկական իմունոլոգիայի պրոֆեսոր Նիմա Ռեզաեին։
Իրանցի գիտնականն իր հետազոտությունները ներկայացրել է անցյալ տարվա վերջին Երևանում՝ Սլավոնական համալսարանում, USERN միջազգային գիտական կոնգրեսի ժամանակ: Ռեզաեին այդ կոնգրեսի կազմկոմիտեի համանախագահն է, ինչպես նաև Իրանի իմունային անբավարարության հետազոտության կենտրոնի հիմնադիրն ու ղեկավարը:
Ռեզաեին հետազոտել է նեյտրոպենիայով տառապող հիվանդներին։ Այդ հիվանդագին վիճակն առաջանում է նեյտրոֆիլների (լեյկոցիտների տեսակ է) մակարդակի նվազման պատճառով և իջեցնում է դիմադրողականությունը: Հիմա այդ հիվանդները բուժվում են G-KSF (գրանուլոցիտար աղեխթանիչ գործոն) դեղամիջոցով, որը բուժառուները սովորաբար ընդունում են շաբաթական երեք անգամ։ Նոր մեթոդը թույլ է տալիս դեղորայքի ընդունումը կրճատել մինչև երեք շաբաթը մեկ անգամ։
Որպեսզի դեղամիջոցի մասնիկներն ավելի լավ թափանցեն արյան մեջ և ավելի հեշտությամբ կապվեն բակտերիաների և վիրուսների հետ, գիտնականները դրանք ծածկել են պոլիմերով (պոլիէթիլենգլիկոլ): Ռեզաեի խոսքով` այս մեթոդը փորձարկվել է մի խումբ հիվանդների վրա և առայժմ արդյունավետություն է ցույց տալիս։
Սովորաբար նեյտրոպենիայի սուր դեպքերը դրսևորվում են քիմիաթերապիա ստացող քաղցկեղով հիվանդների մոտ, բայց կան նաև գենետիկայով պայմանավորված բնածին դեպքեր: Ռեզաեին կարողացել է գտնել, թե որ գեների թերություններն են պատասխանատու հիվանդության համար. դրանք Hesx1 և lostas2 գեներում «խափանումներն» են (15 տարի առաջ իրանցի գիտնականը եղել է միջազգային գիտական խմբի կազմում, որը գիտական աշխարհում հայտնի է դարձել Hesx1 գենի հայտնաբերմամբ):
Վերջին 10 տարվա ընթացքում Ռեզաեին ընդլայնել է ուսումնասիրությունները՝ հետազոտվող պացիենտների թիվը 200-ից հասցնելով ավելի քան 500–ի: Այս հիմքի վրա նա Թեհրանի բժշկական գիտությունների համալսարանում ստեղծել է իմունային հիվանդությունների ազգային ռեգիստր, որն անընդհատ համալրվում է։
Բացի նեյտրոպենիայից, գիտնականն իր գործընկերների հետ հետազոտել է շնչուղիների և թոքերի հիվանդություններով բուժառուներին (սինուսիտ, թոքաբորբ)։ Նրանց մոտ, որպես կանոն, իմունոգլոբուլինի մակարդակի նվազում է նկատվում, և գիտնականի խնդիրն է եղել հասկանալ, թե արդյոք դրա «մեղավորը» գեները չեն։ Ռեզաեիի խոսքով՝ մինչ այժմ արված հետազոտությունները հաստատում են, որ դրանցով հիվանդանալու կամ դրանք ավելի ծանր ձևով տանելու ռիսկն ավելի մեծ է այն մարդկանց մոտ, որոնց մոտ գենային «խափանումները» խանգարում են իմունային համակարգի լիարժեք աշխատանքին:
Հավելենք, որ Ռեզաեին երկար տարիներ աշխատում է հայ գործընկերների հետ, որոնց հետ ավելի վաղ մի շարք համատեղ գիտական հոդվածներ է հրապարակել: