Անժելա Պողոսյանը երևանյան տրոլեյբուսների առաջին ու դեռևս միակ կին վարորդն է։ Արդեն մոտ 9 ամիս է՝ վարում է 10Ա տրոլեյբուսը, բայց ուղևորների դեմքին շարունակում է լայն ժպիտ հայտնվել, երբ դռները բացվում են, վարորդի նստարանին ժպտերես կին են տեսնում։
Երկար ճանապարհներ միշտ է սիրել, մտքով անցնում էր բեռնատարի վարորդ դառնալ, որոշեց տրոլեյբուսից սկսել։
«Հին տրոլեյբուսների վրա էին ինձ սովորեցնում վարել։ Դե պարզ է` անփորձ էի, միանգամից նորերը չէին վստահի։ Չեմ ասի, թե դժվար էր, ուղղակի ավելի ծանր էր։ Գլուխ գովալ չլինի, բայց ես արագ եմ սովորում։ Դա էլ սովորեցի»,– ժպտալով պատմում է Անժելան։
Տրոլեյբուսի ղեկի դիմաց նստելու առաջին իսկ օրվանից սիրեց գործը․ դժվար է, պատասխանատու, բայց ամեն առավոտ մեծ սիրով է աշխատանքի շտապում։ Իրենց միակ կին գործընկերուհու հանդեպ առանձնահատուկ ուշադիր ու հոգատար են մյուս վարորդները, ցանկացած խնդրի դեպքում արագ օգնության են հասնում։
Մարտի 8-ին Անժելան ցանկանում է, որ բոլոր կանայք երջանիկ լինեն, հավատան իրենց ուժերին ու վստահ լինեն՝ իրենք ամեն ինչ են կարող։