ԵՐԵՎԱՆ, 7 մարտի – Sputnik. ՀՀ տնտեսությունը պետք է դիվերսիֆիկացնել, սակայն դա չի նշանակում մի խոշոր գործընկերոջը փոխարինել մեկ ուրիշով։ Կառավարության նիստից հետո ճեպազրույցի ժամանակ ասացՀՀ էկոնոմիկայի նորանշանակ նախարար Գևորգ Պապոյանը։
«Պետք է ունենաս մի քանի խոշոր ու բազմաթիվ ավելի փոքր առևտրային գործընկերներ։ Դիվերսիֆիկացիան այն է, որ ՀՀ–ն համաչափ կախված է լինում աշխարհից, ու նույնն էլ մյուս երկրներն են համաչափ կախված լինում ՀՀ–ից։ Այսինքն` սա փոխադարձ գործընթաց է»,– հայտարարեց նա։
Արդյոք ենթակառուցվածքների առումով մեր երկիրը պատրա՞ստ տնտեսության նման դիֆերսիֆիկացմանը, Պապոյանը նշեց, որ ՀՀ սահմաների մեծ մասը փակ է, որը օբյեկտիվորեն մեծ խոչընդոտ է, սակայն միևնույն ժամանակ ՀՀ իշխանությունները դա համարում են ընդամենը դժվար մարտահրավեր։
«Մենք մեզ չենք սահմանափակում այդ դժվարությամբ. անընդհատ ու ամենօրյա աշխատանքով ես և մեր թիմը որոնելու ենք ու փորձելու ենք գտնել ՀՀ տնտեսության զարգացման համար նոր ուղիներ»,– նշեց Պապոյանը։
Հարցին` ՌԴ-ի հետ առևտրաշրջանառությունն անընդհատ աճում է, այս դեպքում ո՞ր երկրներին է նորանշանակ նախարարը դիտարկում որպես այլընտրանք, Պապոյանն ասաց, որ պետք չէ ՌԴ–ն հակադրել մյուս երկրների հետ, այլ բոլոր ուղղություններով պետք է առևտրաշրջանառությունն ավելացնել։