ԵՐԵՎԱՆ, 6 մարտի – Sputnik. Ռուսաստանը Հայաստանին միջգերատեսչական խորհրդակցություններ է առաջարկել ՀԱՊԿ-ի վերաբերյալ մտահոգությունները փարատելու համար։ Այսօրվա ճեպազրույցի ժամանակ այս հայտարարությունն արեց ՌԴ ԱԳՆ պաշտոնական ներկայացուցիչ Մարիա Զախարովան։
«Մենք հայ դաշնակիցներին առաջարկել ենք միջգերատեսչական խորհրդակցություններ անցկացնել հարցը առարկայական քննարկելու և նրանց մտահոգությունները վերացնելու համար։ Այդ նախաձեռնությանը նրանք դեռ չեն պատասխանել»,-ասաց Զախարովան։
Ինչ վերաբերում է ԵԱՏՄ-ին, ապա ՌԴ ԱԳՆ պաշտոնական ներկայացուցիչը պարզաբանեց, որ այդ հարթակում քաղաքական հարցեր չեն քննարկվում, լուծվում են տնտեսությունների զարգացման հետ կապված խնդիրները: Նա հիշեցրեց, որ Հայաստանը միության առաջատարն է մի շարք ցուցանիշներով։
Հիշեցնենք` փետրվարի 23-ին հայտնի դարձավ, որ ՀՀ վարչապետը «France24» հեռուստաալիքին տված հարցազրույցում ասել է` Հայաստանի նկատմամբ Հավաքական անվտանգության պայմանագիրը չի կատարվել, ուստի Երևանը սառեցրել է իր մասնակցությունը կազմակերպությանը (ՀԱՊԿ):
Ավելի ուշ ՌԴ ԱԳՆ-ն հայտարարություն տարածեց, որ Ռուսաստանը երկկողմ խողովակներով սպառիչ պարզաբանումներ է ակնկալում Հայաստանից, թե ինչ են նշանակում վարչապետ Նիկոլ Փաշինյանի խոսքերը Հավաքական անվտանգության պայմանագրի կազմակերպությունում (ՀԱՊԿ) Երևանի մասնակցության սառեցման մասին:
Նշենք, որ Հայաստանի իշխանությունը բազմիցս մեղադրել է ՀԱՊԿ-ին և Ռուսաստանին իրենց պարտավորությունները չկատարելու մեջ։ Հունվարին ՀՀ անվտանգության խորհրդի քարտուղար Արմեն Գրիգորյանը հայտարարեց, որ Հայաստանն այլևս որևէ ակնկալիք չունի ՀԱՊԿ–ից, քանի որ համարժեք արձագանք չի ստացել 2022 թվականի սեպտեմբերյան լայնամասշտաբ հարձակումների ժամանակ։ 2023 թվականի նոյեմբերին վարչապետ Նիկոլ Փաշինյանը հրաժարվեց մասնակցել Մինսկում կայանալիք ՀԱՊԿ գագաթնաժողովին։