ՌԴ արտգործնախարար Սերգեյ Լավրովը կարծում է, որ սխալ կլինի ասել, թե ԱՄՆ-ն փորձում է հետ քաշվել Ֆրանսիայի նախագահ Էմանուել Մակրոնի խոսքերից, որը բարձրացրել է արևմտյան երկրների զորքերն Ուկրաինա ուղարկելու հարցը:
«Իր հայտարարության պատճառով ստեղծված աղմուկից հետո Մակրոնը ասել է, եթե ճիշտ եմ հասկանում, որ չի հրաժարվում իր խոսքերից։ Բայց դուք նշեցիք, որ Վաշինգտոնը սկսել է չընդունել նման դիրքորոշումը, դա այնքան էլ այդպես չէ։ Իսկապես, նախագահ Բայդենն ինչ-որ բան ասաց, թե մենք չենք պատրաստվում պատերազմել, իսկ պաշտպանության նախարար պարոն Օսթինը, հիվանդանոցից դուրս գալով, հայտարարեց, որ եթե Ուկրաինան պարտվի Ռուսաստանին, ապա ՆԱՏՕ-ն ստիպված կլինի պայքարի մեջ մտնել Ռուսաստանի հետ։ Գործը լուրջ է»,-ասել է Լավրովը՝ ելույթ ունենալով դիվանագիտական համաժողովում։
Օսթինի խոսքերը Լավրովն անվանել է Ֆրոյդյան խառնաշփոթ։
«Նա ֆրոյդյան ձևով բերանից թռցրել է այն, ինչ մտքում կար։ Չէ որ մինչ այդ բոլորն ասում էին՝ չի կարելի թույլ տալ, որ Ուկրաինան պարտվի, քանի որ այդտեղ Պուտինը չի հանդարտվի և կգրավի Մերձբալթյան երկրները, Լեհաստանը, Ֆինլանդիան։ Պարզվում է, պարոն Օսթինի բաց, երկիմաստ արտահայտությամբ ամեն ինչ ճիշտ հակառակն է»,-ասել է Ռուսաստանի ԱԳ նախարարը։
Ավելի վաղ Ֆրանսիայի նախագահ Էմանուել մակարոնը հայտնել էր, որ ԵՄ-ն պայմանավորվել է «խորը հարվածների համար իններորդ կոալիցիա» ստեղծել՝ Ուկրաինային միջին և հեռահար հրթիռների մատակարարման համար: Նա նաև հայտարարել էր, որ Ֆրանսիան ամեն ինչ կանի, որպեսզի Ռուսաստանը «չհաղթի այս պատերազմում»: Մակրոնի հայտարարություններից կարճ ժամանակ անց ՆԱՏՕ-ի և Եվրամիության մի շարք երկրների ղեկավարներ հայտարարեցին, որ մտադիր չեն իրենց զինվորականներին Ուկրաինա ուղարկել:
Նույնպիսի հայտարարությունն էր արել նաև ԱՄՆ պետքարտուղարությունը՝ հղում անելով նախագահ Ջո Բայդենին։ Միևնույն ժամանակ, պետդեպարտամենտի պաշտոնական ներկայացուցիչ Մեթյու Միլլերն ընդգծել էր, որ յուրաքանչյուր երկիր ինքը կորոշի՝ զինվորականներ ուղարկել Ուկրաինա, թե ոչ, իսկ Պենտագոնի ղեկավար Լլոյդ Օսթինը հայտարարել էր, որ Ուկրաինայի պարտությունը ներկայիս հակամարտությանը սպառնում է ՆԱՏՕ-ի և Ռուսաստանի ռազմական բախմամբ: